پاکستان اوغانستان تون گچین تعلقداری نا خواہندار ءِ، آرمی چیف

راولپنڈی: آرمی چیف جنرل قمر جاوید باجوہ تون ہشت باسکی اوغان ڈَل اوڑدہی کرینے، اوڑدہی ٹی اوغانستان اٹی ساڑی حالیت آتیا سرجم ہیت و گپ کننگا۔ آئی ایس پی آر نا رد اٹ ہشت باسکی اوغان ڈَل ہراٹی صلاح الدین ربانی، محمد یونس قونی، استاد محمد کریم خلیلی، احمد ضیاء مسعود، استاد محمد محقق، احمد ولی مسعود، عبداللطیف پدرام و خالد نور اوار ئسر۔ ڈَل آرمی چیف جنرل قمر جاوید باجوہ تون اوڑدہی کرے۔ دا وخت آ آرمی چیف جنرل قمر جاویدباجوہ پارے کہ پاکستان اوغانستان تون بھلو و گچین تعلقداری نا خواہندار ءِ۔ و دا رد اٹ ہر وڑ اٹ کمک کن تیار ءِ کہ اوغانستان ءِ ویل انا ایسری کن اسہ جامع ءُ کسر اس رسینگ کے، ہرا علاقائی امن و شونہالی کن المی ءِ۔ آرمی چیف پارے کہ پاکستان اوغانستان نا بندغ آتتون سلوک ءِ، اوغان ڈَل اوغانستان اٹی امن، سوگوی و راجی و اقتصادی شونداری کن پاک فوج نا قربانی و کوشست آتا ستا ءِ کرے۔ ڈَل اوغانستان ءِ مونی دننگ نا بابت تینا گپ و تران آتے کرے۔

(آن لائن)