بلوچستان اٹی پنچ دے ئی پولیو تور مہم نابنا ،21 لکھ چناءِ پڑی کنفنگک

کوئٹہ (اے پی پی) بلوچستان اٹی اینو آن پنچ دے ئی پولیو تور مہم نا بناءِ کننگانے پارلیمانی سیکرٹری جان جوڑی ڈاکٹر ربابہ خان بلیدی ایمرجنسی آپریشن سینٹر کوئٹہ ٹی دا مہم نا بناءِ کرے، داوخت آ ای او سی کوارڈینیٹر راشد رزاق ہم ساڑی ئس، پارلیمانی سیکرٹری جان جوڑی ڈاکٹر ربابہ خان بلیدی ءِ ایمرجنسی آپریشن سینٹر اٹی گونڈ ءُ حوال اس ترسا کمامدارآتا کنڈآن پاننگاکہ بلوچستان نا 25 ضلع غاتیٹی پنچ دے ئی دا مہم اٹی کم و ود بیست و یک لکھ چناتے پولیو آن بچفنگ کن پڑی کنفنگک دا مہم اٹی 8 ہزار 242 نا خڑک ٹیم بشخ ہلیرہ۔ ہرافتیٹی 7 ہزار 443موبائل ٹیم 742 فکسڈ سائٹ اوار ءُ داوخت آ مچ آ دنیا ٹی پاکستان و اوغانستان اِرا ہندن ءُ ملک ءُ ہراڑے پولیو وائرس داسکان ارے۔ داسال بلوچستان آن 16 پولیو نا کیس رپورٹ مسنے، بلوچستان اٹی پولیو وائرس ارے ہرا بے کچ گڑتی نا ہیت اسے۔ کوئٹہ، پشین وخاص وڑاٹ ضلع قلعہ عبداللہ ٹی چناتیکن پولیو وائرس آن زہمی مننگ نا گڑتی داسہ ہم ارے اینو آن صوبہ نا ہرا ضلع غاتیٹی دا مہم بناکننگ ءِ اوفتے ٹی بارکھان، بولان، ڈیرہ بگٹی، دکی، ہرنائی، کوئٹہ، پشین، قلعہ عبداللہ، جعفر آباد، جھل مگسی، قلات، خضدار، کوہلو، قلعہ سیف اللہ، لسبیلہ، لورالائی، مستونگ، موسیٰ خیل، نصیر آباد، شیرانی، سبی، صحبت پور، سوراب، ڑوب، و زیارت اوار ءُ۔ داوخت آ پارلیمانی سیکرٹری جان جوڑی ڈاکٹر ربابہ بلیدی پارے کہ بلوچستان آن پولیو نا پورو چٹفنگ کن غٹ مکتبہ فکر انا مخلوق ءِ اواری اٹ کاریم کروئی مریک۔ اوپارے کہ بلوچستان اٹی پولیو نا پوسکن آ کیس آک گڑتی نا سوب ءُ ہرافتا توننگ کن حکمت عملی ءِ پین گچین کروئی مریک و کمتی و لاپرواہی تا پیدواری ءِ کرسا دافتا تدارک ءِ کروئی مریک۔ دا چرجوئی ٹی غٹ اسٹیک ہولڈرز سلابتی عمل ءِ پین گچین کیر اوپارے کہ بلوچستان آن پولیو نا چٹفنگ کن سنبرینگوک اُن۔