کورونا وائرس نا سوب آن ارغ و پراٹھہ جوڑ کننگ ہیل کریٹ‘بسمعہ معروف

لاہور (مانیٹرنگ ڈیسک) قومی ویمنز کرکٹ ٹیم نا کیپٹن بسمہ معروف پارینے کہ کورونا وائرس نا سوب آن اُرا ٹی اخس وخت کہ رہنگوئی تما ہندا وخت اٹ ای گراؤنڈ نا وڑ گول ءُُ ارغ و پراٹھہ جوڑ کننگ ءِ ہیل کریٹ۔ بسمہ معروف پارینے کہ ارغ جوڑ کننگ مالو آن ہم بسکہ ولے ارغ و پراٹھہ جوڑ کننگ کتوٹہ۔ ہرا داسہ کنے بریک۔ 5 تو آن اُرا ٹی ءِ، اُرا نا کاریم تے تو بھاز کرین داسہ بس کرکٹ گوازی کروئی ءِ، سنگت کرکٹر آتون حال احوالی اُٹ اوفک ہم بس اسہ ہیت اس پارہ کہ داسہ اُرا نا بھاز کاریم کریٹ ننے کرکٹ گوازی کرفبو۔ او پارینے ای سمجھوہ کہ پاکستان کرکٹ بورڈ کرکٹ نا اسہ وار ولدانا بنا کن ایس او پی تیار کننگ اٹی ءِ، داڑکن ننے بائیو سیکیور چاگڑد اٹ رہنگوئی تما تو رہنگنہ انتئے کہ مالو اسُل داخس کرکٹ آن مُر سلتنن ہندا سوب آن ننے داسہ کرکٹ گوازی کروئی ءِ، بس داسہ کرکٹ بایدے شروع مرے۔ ٹی وی تون ہیت وگپ کرسا بسمہ معروف پارینے کہ ای تینے خوش قسمت اس تکوہ کہ کنے جوان ءُُ الہ تاتہ ملانے، کنا برام فیملی ٹی مس او وخت اس کہ اوفتے مالو آن سما ئس کہ اخس اختہ مریوہ و کنے گوازی ءِ اخس وخت تروئی تمک، ہندا سوب آن اوفتے ہچ ءُُ ویل اس متنے وخت اس کہ کنے الہ تاتہ نا کنڈآن سپورٹ کریٹ ہندا سوب ءِ کہ ای برام آن پد گوازی ءِ برجا تخوہ۔ او پارینے کہ اگہ کنا مالم خیلی کنے سپورٹ کتوکہ تو ای بھاز مالو کرکٹ ءِ ہلاسُٹ، کنا مالم خیلی جڑانوالہ ٹی رہنگرہ وخت اس کہ کنے کرکٹ کن لاہور اٹ رہنگوئی تمک داڑا ہم اوفک اسُل اعتراض کتنو۔ قومی کیپٹن نا پاننگ ءِ کہ کنا تاتہ ڈینٹسٹ اسے، اودے سما ءِ کہ ورکنگ ویمن ءِ اخس اختہ رہنگوئی تمک، ہندا سوب آن کنے اسُل توتنے۔ وخت اس کہ او کنے پین اُست ایتک۔ او کنا میچ آتا بارواٹ سوج کیک کہ کنا میچ آک ہراتم بنا مریرہ او کنا بروک آ اسائمنٹ انت اسے۔