گوازی تا سرگرمی تا بحالی ستا کڑزک‘ جان شیر خان

اسلام آباد (مانیٹرنگ ڈیسک) اسکواش نا مسکوہی جہانی چیمپئن جان شیر خان حکومت نا کنڈآن گوازی تا سرگرمی تے بحال کننگ ءِ جوان پارینے۔ سرکاری خبر رساں ادارہ ءِ انٹرویو ترسا جان شیر خان پارینے کہ ملک اٹ گوازی تا ٹیلنٹ نا کمتی اف وخت اس کہ گوازی گر تے آسراتی تننگ نا گرج ارے۔ او پارینے کہ کورونا وائرس نا دَین نا سوب آن ملک اٹ گوازی و گوازی گرتا بھاز نسخان مسنے ولے دا نسخان ءِ پورو کننگ کن گوازی گر تے سخت آن سخت محنت کننگ نا گرج ءِ انتئے کہ ملک اٹ کورونا وائرس نا سوب آن گوازی گر چار تُو اسکان تینا تینا اُرا تے ٹی بند ئسر، ولے گوازی گرک تینا تینا فزیکل فٹنس آ المی سجفینے ولے گوازی نا پِڑ اٹ پریکٹس بھاز گرج مریک۔ جان شیر خان پارینے کہ مچ آ دنیا ٹی گوازی تا سرگرمیک آہستہ آہستہ بحال مرسا ءُُ ولدا ہم گوازی گر تے ایس او پی تیا المی عمل کروئی تمک۔ مسکوہی جہانی چمپئن پارینے کہ ملک اٹ زیات آن زیات سکواش کورٹ جوڑ کننگ نا گرج ءِ او خلقی کہول آ کیہی چُناتے دا گوازی نا بابت علم اف۔ اسہ سوج اسے نا ورندی ٹی او پارینے کہ دنیا ٹی ہچ ءُُ گوازی اس ہمو وخت اسکان شون ہلنگ کپک ہراتم اسکان دا گوازی ءِ حکومتی و سپانسر نا کماشی دوئی مف۔ او اسپانسر آ زور شاغسا پارینے کہ کرکٹ نا وڑ ایلو گوازی تیا المی سجفنگے۔ او مستی پارینے کہ حکومت ملک اٹ تعلیمی ادارہ غاتے ٹی گوازی تا مقابلہ غاتا اڈ تننگ ءِ پک کے۔