پاکستان زرگزرانی وڑاٹ رکھوک ءُ ہند اسے آٹی ءِ، اسحاق ڈار

اسلام آباد :  بنجائی وزیر خزانہ و محصولات سینیٹر محمد اسحاق ڈار پارینے کہ جون 2023 اٹی پدریسہ چارمیکو تُو حسابات جاریہ نا کھاتہ غاتا توازن 334 ملین ڈالر فاضل ءِ، الحمداللہ پاکستان زرگزرانی وڑاٹ کھ ءُ ہند اسے آ ٹی ءِ۔ سے شنبے نادے آ داڑے میڈیا تون گپ وتران کرسا بنجائی وزیر خزانہ پارے کہ جون 2022اٹی حسابات جاریہ نا کھاتہ غاتا نسخان 2321ملین ڈالر ئسک، تدوک آ مالی سال اٹی حسابات جاریہ نا کھاتہ غاتا نسخان 2.560ارب ڈالر ریکارڈ کننگا ہرا مالی سال 2022اٹی 17.4 ارب ڈالر ئسر۔ وزیرخزانہ پاریکہ واپاری و برجا حساب نا کھاتہ غاتیٹی پیدوار گچینی آن وزیراعظم محمد شہباز شریف نا حکومت نا گچین انتظام و انصرام نا عکاسی مننگ ءِ۔ اوپارے کہ ساڑی حکومت گچین، دانشمندانہ و عملی پالیسی و گام گیج آتا کمک اٹ ملک ءِ خواتہ مننگ آن بچفے، نن تدوک آ اسہ سال اٹی غٹ پیشن نا زرتس وخت آ کرینے، و داہیت ءِ پک کرے کہ پاکسان وام تیٹی خواتہ مف۔ اووزیراعظم محمد شہباز شریف، وزارت خزانہ و اسٹیٹ بینک انا چاہندار آتا کوشست آتا ہم ستاءِ کرے و پارے کہ ملک ءِ 17 ارب ڈالر نا نسخان اٹی شاغوک آ دا پنڈت آتا پیش گوئیک اینو غلط ثابت مننگ ءُ، دافک ملک انا تہہ وپیشن تولسا ملک انا خواتہ مننگ نا تاریخ تسرہ حالانکہ پاکستان ءِ دا نسخان تا گواچی کننگ نا زموار ہم ہندافک ئسر۔ وزیرخزانہ پارے کہ الحمداللہ پاکستان زرگزرانی وڑاٹ رکھ ءُ ہند اسے آ ٹی ءِ۔ وزیرخزانہ پارے کہ ننا پورو کوشست ءِ کہ ہراتم اگست اٹ نن حکومت ءِ ہلن کان تو زرمبادلہ نا کوڑی 14 آن ہلیس 15 ارب ڈالر نا کچ آ مرے۔ تدوک آ سال ننا حکومت نا بناآہم زرمبادلہ نا کوڑی 14 آن ہلیس 15 ارب ڈالر نا نیام اٹ ئسر۔

(اے پی پی)