اولیکو گوازی یونیورسٹی نا بنا بھاز بھلو سرسہبی اسے، شہباز شریف

اسلام آباد :  وزیراعظم محمد شہباز شریف پارینے کہ گوازی تا بشخ اکن 5 ارب روپئی جتا کرینے، دُوارہ وارخواہی رسینگا تو تعلیم، فنی تعلیم و گوازی تا میدان جوڑ کننگ کن اخہ در وسیلہ درکار مس ایتنہ، ورناک ہرملک انا سرمایہ مریرہ، کچ اٹنگا وسیلہ غاتیان پد ہم ورناک گوازی تا میدان اٹ پاکستان نا پن ءِ روشناکریر، مچ آ قوم ملک انا پن ءِ روشنا کروک آتے خراج تحسین پیش کیک، زرمبادلہ نا کوڑی تیٹی تدوک آ دے 60 کروڑ ڈالر نا ودکی مس، سنگت ملک آتا کمکاری آن زرگزرانی ٹک آک گچین مننگ ءُ، ورناتا خواری و جہد اٹ پاکستان مون آ کاہک، ورناتیکن اخہ در وسیلہ درکار مس ایتنہ۔ داخیال آتا درشانی ءِ او سے شنبے نادے آ داڑے وزیراعظم یوتھ اسپورٹس انیشی ایٹیو نا بناءِ کننگ نا دود آن تران کرسا کرے۔ داوخت آ بنجائی وزیر حوالکاری و شینکاری مریم اورنگزیب، بنجائی وزیر بین الصوبائی رابطہ احسان الرحمان مزاری، وزیراعظم نا خصوصی کمکار امور نوجوانان شزا فاطمہ آن بیدس گوازی گر آتا بھلو کچ اس ساڑی ئسر۔ دود آن تران کرسا وزیراعظم پارے کہ قوم انا مار و مسنک تینا خواری اٹ گوازی تا میدان اٹ پن کٹانو ہراڑا اوفتے خراج تحسین پیش کیوہ۔ کچ اٹنگا وسیلہ غاتیان پد ہم تینا ٹرینر، کوچ و لمہ و باوہ غاتا دعاتے اٹ پاکستان نا دنیا ٹی پن ءِ روشنا کریر۔ پاکستان ایلو پڑتیٹی اگہ سست روی نشان تسنے تو داورناک گوازی تا پڑاٹ پاکستان نا بیرک ءِ مچ آ دنیا ٹی بڑزکرینو۔ وزیراعظم پارے کہ اینو 5 ارب روپئی نا وزیراعظم فنڈ انا پڑو بنجائی وزیر احسان الرحمان کرے۔ بنجائی وزیر و خصوصی کمکار بھاز خواری کرینے۔ دا 5 ارب روپئی ٹی گوازی گرآتا ٹکٹ، لاجسٹک، ہنکین و کٹ اوار مریرہ۔ دا 5 ارب روپئی مچ آ ملک اکن نت اٹی بے انا بریبر ءُ۔ کروڑ آ ورناتے اگہ سہی چاگڑد و آسراتی دُوبرے تو دنیا نا گچین ٹیم تیان دا مون آ پیش تمنگ کیرہ۔ وزیراعظم پارے کہ اومیت ءِ کہ بروک آک دا بجٹ ءِ ودفرہ۔ پاکستان نا زرمبادلہ نا کوڑی تیٹی 60 کروڑ ڈالر نا تدوک آ دے ودکی مسنے۔ چین نا بینک دا زر ءِ رول اوور کرے، دا چنکو ہیت اس اف، نن احسان کروک آتے یات تخنہ۔ وزیراعظم پارے کہ ننا زرمبادلہ نا کوڑیک ودنگ ءُ۔ ننا دعا ءِ کہ دا کوڑی تیٹی وام تا جاگہ غا ننا خون پسینہ و خواری اٹ ودکی مرے۔ اسپیشل اولمپکس اٹی گولڈ میڈل دوئی کروک آتینا چناتیان نن سبخ و ہمت اس دوئی کین۔ دا چناک ہر بشخ اٹی تینے منفنگ ءُ۔ ہندافتا خواری نا سوب آن پاکستان مون آ کاہک۔ وزیراعظم باوری کرفے کہ اگہ اللہ دُوراہ موقع تس تو قوم انا دا کروڑ آ مار و مسن تا تعلیم، فنی تعلیم و گوازی نا پڑ جوڑ کننگ و بیرفنگ اٹ اخہ در وسیلہ درکار مس مہیا کینہ۔ داغٹ اللہ و اوکان پد قوم انا دوٹی ءُ۔ وزیراعظم نا خصوصی کمکار امور نوجوانان شزافاطمہ خواجہ تران کرسا پارے کہ مسلم لیگ (ن) گوازی تا مون آ دننگ ءِ تینا اولیت آتیٹی تخانے، شہباز شریف بطور وزیراعظم ڈیپارٹمنٹل سپورٹس ءِ بحال کرینے۔ حکومت ٹیلنٹ ہنٹ کرفینے۔ داتُو انا ایسر آ قومی کہول آ مقابلہ مریک۔ اسپورٹس انیشی ایٹیو نا رداٹ گوازی تا مون آ دننگ کن 5 ارب روپئی تخنگا۔ انڈوومنٹ فنڈ اس جوڑ کننگ انگ ءِ داٹی ہرسال ودکی مریک۔ داڑان مسکوہی گوازی گرآتے ہم مالی امداد ملک۔ دمدستی وڑاٹ خڑچ آتے پورو کننگ کن دونیم ارب روپئی جتا کننگانے۔ اسلام آباد اٹی اولیکو سپورٹس یونیورسٹی اس جوڑ کننگ انگ ءِ۔ دود آن بنجائی وزیر بین الصوبائی رابطہ احسان الرحمان مزاری تران کرسا پارے کہ تدوک آچار سال اٹی گوازی تا بشخ ءِ گوجالنگا۔ کچ اٹنگا وسیلہ غاتیان پد ہم گوازی تا بشخ انا گچینی کن گام گیج کننگ ءِ۔ گوازی تا انفراسٹرکچر ءِ گچین کننگ کن گام گیج کننگ انگ ءِ۔ اسپورٹس انیشی ایٹیو ساڑی حوکمت ناگوازی سنگتی نا شاہدی ءِ۔ وزیراعظم داوخت آ چترال آن تعلق تخوک آ ٹیبل ٹینس نااسپیشل گوازی گر الطاف الرحمان ءِ سپورٹس ویل چیئر نا ہلنگ کن 3نیم لکھ روپئی نا چیک اس پیش کرے۔ وزیراعظم اسپیشل اولمپکس اٹ تمغہ دوئی کروک آ گوازی گرآتے 50 لکھ روپئی نا چیک اس تس۔ وزیراعظم داوخت آ اولیکو اسپورٹس یونیورسٹی نا بناءِ ہم کرے۔

(اے پی پی)