ملٹری ٹرائل کورٹس، فل کورٹ نا درخواست مسترد

اسلام آباد: چیف جسٹس آف پاکستان سول شاری تا ملٹری ٹرائل نا برخلاف دائر کروک درخواست آتا سماعت ناوخت آ سوج چست کرینے کہ اگہ دا واقعہ غاتے ٹی فوج انا تہہ انا تعلقداری پک مس تو مگہ ملٹری کورٹ آتے ٹی ٹرائل کن ولدا ہم آئینی ترمیم نا گرج مریک‘ اگہ دوبہ دار آ تعلقداری پک مرے گڑا انت مریک‘ مگہ خصوصی عدالت آن مراد ہمو عدالت ءِ ہرا ہائیکورٹ نا شیف اٹ مرے، لیاقت حسین کیس اٹ پاننگا کہ ملٹری اتھارٹیک جاست پاست کننگ کیرہ‘ سویلین نا ٹرائل آخا۔ چیف جسٹس صدر سپریم کورٹ بار ءِ پارے کہ نی پاننگ اٹی اُس کہ دوبہ دار آتا تعلقداری ٹرائل کن اولیکو گرج ءِ؟ نا پاننگ نا رد اٹ تعلقداری و آئینی ترمیم آن پد سویلین تا فوجی عدالت آتے ٹی ٹرائل مننگ کیک‘ دا جوان ءُ ہیت اسے کہ آرمی تون بندی بندغ آتے اوفتا خاہوت آتتون ملنگ کن النگ انگ ءِ‘ داوخت آ جج آک افس فل کورٹ ٹہیفنگ مفک‘ مسہ جج کیس ءِ بننگ آن نمن مسنو وخت اس کہ منہ جج پیشن ملک آ ہنانو‘ سَے شنبے نا دے سپریم کورٹ اٹ باندات نا سماعت ءِ چیف جسٹس آف پاکستان ناکماشی ٹی شش باسکی لارجر بینچ کرے۔ سماعت ناوخت آ جسٹس یحییٰ آفریدی سوج چست کرے کہ کونسل تینا موقف ءِ پیدوار کے کہ دوبہ دار آتا تعلقداری پک مننگ ٹرائل کن گنج اس مریک؟ مگہ آئینی ترمیم آن بیدس سویلین تا ٹرائل مننگ کپک‘ او عابد زبیری آن سوج کرے کہ نی دا پاننگ اٹی اُس کہ اول اٹ پولیس دزگیر کرسا لس عدالت آتے ٹی ڈوہ بیٹ کے ولدا باندات ملٹری کورٹ اٹ کاہے؟ رول تے ٹی ہرا چارج انا لوزءِ مگہ باضابطہ ڈوہ بیٹ کننگ نا ہیت ارے؟رول اٹ لوز چارج آن مراد ڈوہ بیٹ کننگ ءِ یا بیرہ بنائی دوبہ ءِ؟جسٹس اعجاز الاحسن دا وخت آ ریمارکس تس کہ لیاقت حسین کیس اٹ آئینی ترمیم آن بیدس ٹرائل کننگاسس‘ فوج اتون تہہ آن تعلقداری پک مس تو ولدا ہم آئینی ترمیم نا گرج مریک؟ لیاقت حسین کیس اٹ آئینی ترمیم آن بیدس ٹرائل کننگا‘ دا فیصلہ ءِ دیر کیک کہ دیر آ آرمی ایکٹ لگک دیر آ لگپک؟ جسٹس عائشہ ملک دا وخت آ ریمارکس تس کہ داکان مست بنجائی حکومت تینٹ بینچ اسے نا اسہ باسک آ اعتراض کرے‘ مگہ داسہ حکومت فل کورٹ انا پاننگ کیک؟ دیر فیصلہ کیک کہ ہرا جج ساڑی ءِ؟ اٹارنی جنرل تینٹ امنا کننگ اٹی ءِ کہ بینچ انا ٹہیفنگ نا فیصلہ ءِ چیف جسٹس کیک‘ او اٹارنی جنرل آن سوج کرے نی پاننگ اٹی اُس کہ 17 غان زیات جج دا کیس اکن ساڑی مریر ہراکہ مننگ کپک۔ جسٹس منیب اختر دا وخت آ پارے کہ سوج دادے کہ سویلین تیا آرمی ایکٹ انا اطلاق امر مننگ کیک؟ بھلو ہَد اسسکان ساڑی بینچ تینٹ دا کیس اناسماعت ءِ کرینے۔داکان مست درخواست گزار صدر سپریم کورٹ بار ایسوسی ایشن ایڈووکیٹ عابد شاہد زبیری نا عدالت نا مون آ دلیل تسنے کہ سپریم کورٹ 1999 اٹ لیاقت حسین کیس آن اصول پک کرینے کہ فوجی عدالت آتے ٹی سویلین نا ٹرائل مننگ کپک‘ آرمی ایکٹ انا رد اٹ سویلین تا ٹرائل مننگ کپک“ جسٹس اجمل میاں نا فیصلہ نارد اٹ ٹرائل بیرہ فوجی کارندہ غاتا مننگ کیک۔ عدالت داکان مست تینا فیصلہ ٹی پارینے کہ آرمی ایکٹ انا رد اٹ سویلین تا ٹرائل کن آئینی ترمیم درکار مریک‘ آرٹیکل 83A انا رد اٹ سویلین تا ٹرائل فوجی عدالت آتے ٹی مننگ کپک۔

(آن لائن)