بھلا سختی تیان پد ہم پاکستان نا آخبت روشناءِ، سینیٹر اسحاق ڈار

اسلام آباد: بنجائی وزیر خزانہ سینیٹر اسحاق ڈار پارینے کہ غٹ مشکل آتیان پد ہم پاکستان نا آخبت روشنا ءِ ہراوڑ سینیٹ نا گولڈن جوبلی نا دود آتا مسہ دے داڑے امن، نظم و ضبط و اسہ ایلو نا شرف و سگ انا کلچر ءِ خنان اللہ کے دا چرجوئی مدام برجاسلے۔ سینیٹ آف پاکستان نا گولڈن جوبلی دود آتا اڈتننگ آ چیئرمین سینیٹ ءِ مبارکبادی ترسا اوپارے کہ ننے تینا اجداد نا کنڈآن جتا مملکت اسے نا جوڑ کننگ نا مسخت آتے مون آ تخوئی مریک، دامسہ دے ئی دود آتیٹی امن، ڈسپلن و سگ اتون اوار اسہ ایلو نا شرف ءِ خنان، دا مہذب ءُ پارلیمان و جمہوری نظام اسے نا بنداو ءِ، کنا دا دعا ءِ کہ دا چاگڑد ہرا داڑے نظر بس او مدام قائم و دائم سلے۔ اوپارے کہ سینیٹ آف پاکستان جہانی آب آتا رداٹ تینے بدل کننگ اٹی ءِ، رابطہ و شفافیت پارلیمان کن اہمیت تخک، داٹی ہچ ءُ شک اس اف کہ انتظامی وپالیسی گام گیج آتینا بنجا، جمہوریت و گورننس سوگو مریک، سینیٹ نا کارروائی ٹی السی شرکت جوان ءُ گام اسے، داڑان الس نا پارلیمانی جمہوریت آ پت بحال مریک۔ اوپارے کہ داجمہوریت، پارلیمان، کانود ساز و پاکستان نا الس کن وخت ءِ داڑتون اوار اوار دا بنجا و بنجائی اکائی تا وخت ءِ۔ اوپارے کہ 50 سال مست دا سینیٹ نا قیام پاکستان نا تاریخ اٹ اسہ پوسکن ءُ بشخ اسے و داڑان بنجا پاکستان ءِ سوگوی ملا۔ اوپارے کہ ساڑی آ چیئرمین تون اوار اوار مسکوہی چیئرمین و ڈپٹی چیئرمین ءِ ہم مبارکبادی ایتنہ۔ ہرافک بنجاءِ مون تروک ویل آتا داڑے ذکر ءِ کریر۔ اوپارے کہ چیلنج آتیان پد ہم اسہ روشنا آخبت تینا مون آ نظر بننگ اٹی ءِ۔ دا ایوان، تینا محبوب وطن و تینا الس کن روشنا آخبت نظر بننگ ءِ، کلمہ نا بنداو آ دوئی ملک ءِ اللہ ہروڑنا خطرہ غاتیان رکھے۔

(اے پی پی)