نواز شریف زُو بریک، الیکشن مہم نا کماشی ءِ کیک، مریم نواز

لاہور : پاکستان مسلم لیگ (ن) نابنجائی نائب صدر و چیف آرگنائزر مریم نواز پارینے کہ سیاسی سرکڑدہ غاک تینا کاز اکن پاہلو کارہ‘ زندان نا بندی تے برداشت کیرہ ولے تینے ڈکپسہ‘ نواز شریف زو پدی پاکستان آ بریک و گچین کاری مہم نا تینٹ کماشی ءِ کیک۔ تینا سیاسی راہشون پاروک آنا وڑک کل انا مون آٹو‘ پی ٹی آئی خانہ جنگی نا ایجنڈا ءِ مونی تروک اسہ عسکری ءُ جماعت اسے، زلمے خلیل زاد ہرا حیثیت اٹ ننا تہہ انا باندات آتے ٹی نیام ترسا بیان تننگ اٹی ءِ‘ عمران خان نادور اٹ صحافی تیا بھاز بیداد کننگا‘ نواز شریف ءِ بد ءُ لقب اٹ توارکننگا‘ سیاسی راہشونک جمہوریت کن بھاز قربانی تسنو‘ عمران خان ہمسائے ملک آتتون تعلقداری تے خراب کرسا پاکستان ءِ دنیا ٹی تنیا کریسس‘ زمان پارک اٹ پاش مس کہ سسلین مافیا و گاڈ فادر انت مریک‘ ہرا حرکت آک چار پنچ دے آن مننگ اٹی ءُ او پاکستان ناتاریخ اٹ متنو۔ عمران خان آصف سعید کھوسہ نا پاننگ آ پاناما نا درخواست ءِ عدالت اٹ ایس‘ عمران خان ءِ ہلوئی مرے تو پنچ منٹ لگپک‘ ریاست بیرہ کشت وخون خواپک‘ قوم اناچناتے پٹرول بمب ترسا پاننگ انگ ءِ کہ ریاست آ جلہو کبو‘ دا بندغ گلگت بلتستان نا وسیلہ غاتے کاریم اٹ اتسا صوبہ غاتے اسٹ ا یلو تون جنگ تننگ خواہک۔آرمی چیف آ دوبہ خلوک آپاہے کہ مگہ آرمی چیف اودے پارینے کہ زمان پارک اٹ تینے ڈکہ و دزگیری تفہ۔ لاہور اٹ مسلم لیگ (ن) نا ایلو سرکڑدہ غاتتون اوار پریس کانفرنس آن تران کرسا مریم نواز پارے کہ سیاستدانک تینا کاز اکن پاہو کارہ‘ زندان اٹ بندی مریرہ‘ بیداد آتے سگرہ‘ ولے اولیکو وار خننگ انگ ءِ کہ اسہ سیاسی جماعت اسے نا اسہ بندغ اس ہرا تینے سیاسی راہشون پاہک و تینا کلی ءِ سیاسی جماعت آتتون ٹنگک‘ او زمان پارک اٹ ہرا حرکت آتے کننگ اٹی ءِ ای تینا تاریخ اٹ دا وڑ خنتنٹ‘ ہرا وڑ تینا جان ءِ بچفنگ کن تینا کانود نا مون آ پیش مننگ آن توننگ کن پنجاب پولیس آ جلہو کرے‘ ہرادے نن پنچ دے آن خننگ اٹی ان و دا ریاست نابرخلاف پاش وڑ اٹ بغاوت اسے و ہرا بغاوت نا پڑو مننگ اٹی ءِ دا اینو نااس اف دا 2014ء آن ہندا وڑ مننگ اٹی ءِ۔ مریم نواز پارے کہ دا 2018ء ٹی ہم اسہ جلہواس پاکستان نا زرگزران آ کرے۔ بارودی سرنگ کھڈ کرے ہرانا نسخان ءِ اینو پاکستان ہرفنگ اٹی ءِ‘ ہراتم اودے لگا کہ حکومت آن ہننگ اٹی ءِ تو او دا سائنفر نا کہانی ءِ جوڑ کرے و ہر جلسہ ٹی کاغد نشان تسکہ و پاکستان نا تعلقداری تے کل ملک آتتون خراب کرے۔

(آن لائن)