ملکی بقاء آئین نا بالادستی و جمہوریت اٹی ءِ، سینیٹ آف پاکستان

اسلام آباد : سینیٹ نا پنجا سالہ گولڈن جوبلی دود آتا وخت آ باسک آک ملک ءِ مون تروک زرگزرانی و سیاسی چیلنج آتا ایسر اس ڈائیلاگ نا کمک اٹ پٹنگ نا گرج آ زور شاغسا پاریر کہ پاکستان نا بقاء آئین نا بالادستی و جمہوریت اٹی ءِ، نن تینا اناکن پاکستان ءِ نسخان تننگ آن بایدے پاناد کین، غٹ قومی سرکڑدہ غاک اسہ پلیٹ فارم اسے مچ مرسا ملک ءِ ویل آتیان بایدے کشر۔ جمعہ نادے آ سینیٹ نا جوڑ مننگ نا 50 سالہ دود آتا آخیریکو دے پاکستان پیپلزپارٹی نا سینیٹر مولابخش چانڈیو گپ وتران کرسا پارے کہ سینیٹ نا پنجاسال پورو مننگ آ گولڈن جوبلی دود آتا اڈتننگ آ مبارکباد پیش کینہ، اوپارے کہ قوم و بولیک چنک یا بھلن مفسہ بلکن گوجالنگ نا سوب آن دا تاثر ودی مریک، ذوالفقار علی بھٹو محب وطن پاکستانی سرکڑدہ اس ئسک اوڑا گمر کینہ۔ غٹ پاکستانی سیاستدان تا شرف ءِ کینہ، او غٹ ننا قومی راہشونک ءُ، اللہ پاکستان اٹ جمہوریت ءِ پین سوگو کے، تینا انا و تکبر کن پاکستان ءِ نسخان تننگ آن پاناد کننگے۔ بلوچستان عوامی پارٹی نا پارلیمانی لیڈر سینیٹر منظور کاکڑ پارے کہ گولڈن جوبلی دود آتا اڈتننگ جوان ءُ گام اسے، ننے غٹ ءِ اواری اٹ دا ملک ءِتنکی تیان کشوئی ءِ، جمہوریت ءِ سوگو کپنہ تو نن شونداری نا کنڈا ہِننگ کپنہ، دانا غٹ آن بھلا شڑت کاریم نا نیت ءِ۔ ننے آئین نا بالادستی و پارلیمان نا بقاکن اواری اٹ تولوئی مریک۔ سینیٹر شمیم آفریدی پارے کہ پاکستان نا الس ءِ داوخت آ غٹ آن زیات گرج نُت انا ءِ او اودے اوفتے ایتر۔ سینیٹر پلوشااحمد زئی پارے کہ اگہ نن مصمم ارادہ کین تو نن آئی ایم ایف نا جاگہ غا گیگ بدل ذریعہ اٹ وسیلہ غاتے دوئی کننگ کینہ، حکومت ءِ مشکل ریسہ غاتا مون تروک ضرور ارے ولے ایٹمی سلہہ غاتیا کس اس سمجھوتہ کننگ کپک نن غٹ پاکستان نا سفیر اُن۔ سینیٹر محمد قاسم پارے کہ پاکستان و جمہوریت 50 سال انا سخت ءُ کسر اسے آن گدرینگسا بسنے ولے بے اومیتی اف، سخت خواری نا گرج ء، اینو نا حالیت آتیان ننے دا سبخ ملنگ ءِ کہ ڈائیلاگ نا کنڈا بَننگے۔ سینیٹر پروفیسر ساجد میر پارے کہ آئین آ اونا رداٹ عملدرآمد مفننگ آن ملکی حالیت خراب مرسا کننگ ءِ۔ وار وار فوجی مداخلت متوکہ تو ملک انا حالیت گچین مسکہ۔ اوپارے کہ پارلیمنٹ الس نا ویل آتے ایسر کننگ کن اولیتی بنداو تیا گام گیج کے۔ اوپارے کہ پارلیمنٹ نا کڑد مثبت مرے و ملک ءِ مون تروک ویل آتیان کشنگ کن اہم کڑد ادا کننگے۔ سینیٹر ہلال الرحمان پارے کہ ای چیئرمین سینیٹ و دا مچ آ ایوان ءِ سرسہب گولڈن جوبلی دود آتا اڈتننگ آ مبارکبادی ایتیوہ و اومیت کیوہ کہ غٹ باسک آک آئین نا بالادستی کن تینا کڑد ءِ ادا کیرہ۔

(اے پی پی)