کل سیاسی و زرگزرانی سوگوی کن کڑد ادا کیر، اعظم نذیر تارڑ

اسلام آباد : بنجائی وزیر کانود و انصاف اعظم نذیر تارڑ پارینے کہ ملک ءِ ساڑی آ زرگزرانی تنکی آن کشنگ کن غٹ سرکڑدہ غاتے اواری اٹ تولوئی تمک، زرگزرانی باندات گچینی نا جاگہ غا ابتری آ ہِننگ لمحہ فکریہ اسے، اپوزیشن ءِ اسہ وار ولدا سلہ خلینہ کہ او دا ملک انا الس نا گچینی کن نن تون اوار تولے۔ جمعہ نادے آ سینیٹ آف پاکستان نا گولڈن جوبلی دود آتا آخیریکو دے گپ وتران کرسا بنجائی وزیر کانود پارے کہ دا ایوان اٹی ہر زند انا بشخ آن تعلق تخوک آ بندغ آتا کنڈآن گولڈن جوبلی دود آتیٹی گپ وتران آن آخبت نا کسرتے پک کننگ اٹ آسانی ودی مریک۔ داشاندار دود انا اڈتننگ آ چیئرمین سینیٹ، اونا ٹیم، سیکرٹری سینیٹ، پروٹوکول سیکشن، میڈیا سیکشن تون اوار غٹ مبارکباد نا حقدار ءُ، اوفتے خراج تحسین پیش کینہ۔ اوپارے کہ داڑے اخس کہ بندغ ساڑی ءُ اوفتا گپ وتران نا وت پاکستان نا زرگزرانی حالیت ئس، سینیٹ بنجا پاکستان نا نشانی ءِ، ملک داوخت آ ہراسخت دور آن گدرینگ انگ ءِ و ہرا سیاسی درجہ حرارت ءِ اوڑاہم داڑے بایدے ہیت مروسس۔ اوپارے کہ نن دا فورم آن اسہ وار ولدا دا عزم انا درشانی ءِ کینہ کہ ریاست پاکستان ءِ شونداری و شونہالی نا کنڈآ دننگ و پاکستان نا الس نا زند اٹی آسانی ودی کننگ کن اینو غٹ سیاسی واکدار آک اسہ جاگہ غا تولسا ملک انا سیاسی و زرگزرانی سوگوی کن تینا کڑد ءِ ادا کیر۔ ننا دا بدبختی ءِ کہ داڑے باندات آک گچین مننگ نا جاگہ غا پدریسہ خراب مسر۔ اوپارے کہ پاکستان نا زرگزرانی حالیت، کرنسی، زرگزرانی نمو ٹی نن شیف و بڑزی نا گواچی مسنن، دانا اسہ بھلو سوب شاید سیاسی نزوری ءِ و سیاسی نزوری نا اسہ بھلا سوب غیرآئینی مداخلت مسنے۔ اوپارے کہ ملک انا تاریخ اٹی اِرا موقع غاتیا آئین معطل و آمرانہ راج نافذ ئس ہرانا وخت ءُ پاس وخت اس دہ سال و وخت اس ہشت سال ئسک۔ اوپارے کہ ننے داسوب آتا جاچ ءِ ہلوئی مریک کہ دا مارشل لا انت اکن نافذ مس۔ اوسوج کرے کہ انت نن مستین آن سبخ ہلپن؟ اوپارے کہ ننے تیان رویہ غاتیٹی سنجیدگی اتنگ نا گرج ءِ، اسہ ایلو نا زنچک اٹ ہلنگ آن ادا ادارہ و ریاست ہڑتوم آک نزور مریرہ، نن سنجیدہ سیاستدان تا وڑاٹ بردباری، تحمل، سگ اٹ اسہ ایلو نا ہیت آتے بایدے بنن، داہیت بھاز تکلیفی اسے کہ دا اہم وخت آ اپوزیشن دا دود آتیٹی بشخ ہلتو۔ نن تینا وڑاٹ کوشست کرین ولے دااوفتا تینا فیصلہ ئس اگہ او ننا نیام اٹ مسرہ تو دا خوشی نا ہیت اس مسکہ و داڑان الس اسکان جوان ءُ کلہو اس ہناکہ کہ پاکستان نا سیاست دان آئین نا گولڈن جوبلی آ اوار تولوک ءُ، کمیٹی آف دی ہول نا بشخ مسرہ تو داڑان جوان ءُ کلہو اس ہناکہ۔ اوپارے کہ سیاست تفریح نا پن اف۔ سیاست تینا نظریہ آ سلنگ نا پن ءِ۔ اواومیت ظاہر کرے کہ داایوان اٹ اپوزیشن ءِ دا کلہو ءِ ایتنہ کہ دا ملک اکن اواری اٹ تولے، جوانی تے پٹر، گندہ ئی تے چٹفر تانکہ بروک آ مون آ پنجاسال شونداری و شونہالی نا مریر۔

(اے پی پی)