آئین نا لتاڑ نا موکل تروک آتا پن بایدے مونی برے، عرفان صدیقی

اسلام آباد : مسلم لیگ (ن) نا سینیٹر عرفان صدیقی پارینے کہ سینیٹ نا کنڈآن آئین نا گولڈن جوبلی نا وخت آ دیوان اڈتننگ بھاز ستاکڑزک، اینو مون تروک زرگزرانی بدحالی و سیاسی بے چیٹی نا سوب دادے کہ جمہوریت نا سفیر ءِ مون آ ہِننگ کن اِلنگتو، آئین ءِ لتاڑ کننگ و اوڑتون گوازی کننگ نا موکل تروک آتا پن بایدے مون آ برے۔ جمعہ نادے آ پارلیمنٹ ہاؤس نا پیشن میڈیا نا نمائندہ غاتون گپ وتران کرسا اوپارے کہ سینیٹ نا کنڈآن آئین نا گولڈن جوبلی نا وخت آ دیوان نا اڈتننگ بھاز ستاکڑزک۔ سینیٹ ہاؤس آف فیڈریشن و بنجانا اُراءِ۔ الیکٹرانک و پرنٹ میڈیا مچ آ قوم ءِ سینیٹ نا کڑد آن معلومدار کننگ کن گچین کڑد ادا کرینو۔ اوپارے کہ دیوان نا ایسر آ سینیٹ اٹی اسہ قرارداد اسے نامنظوری ءِ تننگا۔ ای او قرارداد اٹی ترمیم کننگ کن سیکرٹری سینیٹ ءِ تینا ترمیم ءِ جمع کرفیٹ۔ اوتینا سلاہ ئی ترمیم ءِ میڈیا ءِ خوانسا بنفے ہراٹی پاننگاسس کہ دا ایوان غٹ فوجی آمرانہ دور تا مذمت ءِ کیک ہرافک ملک انا آئین ءِ پرغار و اودے معطل کریر و ہنداوڑ پاکستان نا الس نا بنداوی حق آ ڈاکہ خلکر وخت اس کہ تینا سوغند آن روگردانی کرسا آمرآتا غیرآئینی گام گیج آتے پک کروک آتا ہم مذمت ءِ کیک۔ اوپارے کہ دا سلاہ ئی ترمیم بیرہ کناخیال آخا بلکن متکن و ساڑی آ سینیٹر آتا کم و ود 50 درسد کچ آئین ءِ پرغنگ و ملک انا تقدیر تون گوازی کروک آتا برخلاف ہیت کریر۔ اوپارے کہ اینو نن ہرا زرگزرانی بدحالی و سیاسی بے چیٹی اسکان سرمسنن۔ دا کل دا سوب آن مننگ ءُ کہ جمہوریت نا سفر ءِ توننگا۔ سینیٹر عرفان صدیقی پارے کہ سینیٹ ءِ 50 سال مس، دا 50 سال اٹی ضیاء الحق نا دور اٹی سینیٹ اٹی تعطل ہم بس۔ بھاز انگا باسک آک پاریر کہ ہرافک آئین سازی کریر و آئین نا رکھ اکن کڑد ادا کریر، اوفتا ستاءِ کننگے، و ہرافک آئین ءِ پرغار اوفتا بایدے مذمت مرے۔ اوپارے کہ کنے افسوز ءِ کہ سینیٹ نا امنائی قرارداد اٹی کنا ترمیم ءِ اوار کننگتو و دا قرارداد اٹی چندی باسک آتا احساس و جوزہ غاتا جوان وڑاٹ ترجمانی متو۔

(اے پی پی)