زمان پارک اٹی ریاستی ادارہ غاتے چیلنج کننگ انگ ءِ، مریم اورنگزیب

اسلام آباد: بنجائی وزیر حوالکاری و شینکاری مریم اورنگزیب پارینے کہ زمان پارک اٹی ریاستی ادارہ غاتے چیلنج کننگ انگ ءِ، وار وار آ وخت ملنگ آن پد ہم عمران خان عدالت اٹی پیش متو، او غیرکانودی عمل اٹ عدالت آ اثرانداز مننگ نا کوشست کننگ اٹی ءِ، پولیس کرپشن کیس آتیٹی عمران خان ءِ دزگیر کننگ کن عدالتی پرمان تا پوروی آ زمان پارک اٹی ساڑی ئسک۔ جہانی نشریاتی ادارہ”بی بی سی ” تون گپ وتران کرسا مریم اورنگزیب پارے کہ زمان پارک اٹی کارروائی ٹی پولیس تون ہچ ءُ سلہہ اس الوکہ، پولیس کارندہ غاتے لٹ و خل تے اٹ خلنگا، اوفتا گاڈی تیا پیٹرول بمب آتے اٹ جلہو کننگا۔ دا مجرمانہ فعل نا سوب آن ڈی آئی جی آپریشن تون اوار 65 پولیس کارندہ ٹھپی مسر ہرا ہسپتال اٹی داخل ءُ۔ مریم اورنگزیب پارے کہ عمران خان دزگیری آن بچنگ کن پارٹی کارندہ، زالبول و چناتے سیبو نا وڑاٹ کاریم اٹ ایس۔ اوپارے کہ ساڑی آ آڈیولیک داہیت انا شاہدی ءِ کہ عمران خان تینا کارندہ و سینئر عہدیدارآتیان پیٹرول بٹنگسا پیٹرول بمب آتے اٹ کاریم اٹ اتفے۔ اوپارے کہ عمران خان غیرکانودی عمل اٹ عدالت آ اثرانداز مننگ نا کوشست کننگ اٹی ءِ۔ آئین پاکستان اٹی کانود غٹ اکن بریبر ءِ، ہراکانود کنکن ءِ ہموغٹ اکن ءِ۔ اوپارے کہ اگہ برطانیہ ٹی سیاسی راہشون اس پولیس و عدالتی پرمان تا خلاف ورزی ءِ کے، تینا ورکرآتے سڑک آتیا بیدادی کن ہُشکا ایتے و تینٹ تینے اُراٹی ڈکھے و تینا پارٹی کارندہ غاتے انسانی سیبو نا وڑاٹ کاریم اٹ اتے، تو ہموڑے انت مریک؟ بنجائی وزیر حوالکاری پارے کہ عمران خان کانود نافذ کروک آ ادارہ غاتون کمک ناجاگہ غا کانود شکنی کننگ اٹی ءِ، عمران خان ءِ ملک اٹی خانہ جنگی، بیدادی، بے چیٹی ءِ تہو تننگ نا اسُل موکل تننگ مفک۔

(اے پی پی)