کراچی و حیدر آباد نا الس وونٹ اٹ راہشون تے پیدوار کرے،بلاول بھٹو

کراچی: پاکستان پیپلزپارٹی نا چیئرمین و وزیر خارجہ بلاول بھٹو زرداری پارینے کہ کراچی و حیدرآباد نا الس وونٹ انا واکداری اٹ پن انا پنی آ راہشون تے ہم بے نقاب کریر، بلدیاتی گچین کاری تیان پد پک مس کہ پیپلزپارٹی سندھ انا شاری و خلقی علاقہ غاتا اسٹ انگا غٹ آن بھلا جماعت ءِ، کراچی و حیدر آباد نا الس نا منت واری ءِ ہرفیوہ کہ اوفک جیالہ اومیتدار آتے وونٹ ترسا گچین کریر۔ بلاول ہاؤس آن جاری بیان نا رداٹ داخیال آتا درشانی ءِ او الیکشن کمیشن نا کنڈآن بلدیاتی گچین کاری تا نتیجہ غاتا پڑو آن پد کرینے۔ بلاول بھٹو زرداری پارے کہ پیپلزپارٹی بنجانا زمزیر ءِ و ملک انا غٹ تپہ غاتیا تالان کراچی ٹی پی پی نا جیت مچ آ ملک انا سرسہبی ءِ، کراچی و حیدر آباد نا شونداری کن غٹ سیاسی اکائی تا اواری اٹ کاریم کننگ الس نا شونہالی نا سو ب جوڑ مریک۔ چیئرمین بلاول بھٹو زرداری مستی پارے کہ الس پاکستان پیپلزپارٹی نا اومیتدار آتے گچین کرسا سندھ حکومت نا کارکڑد آ پت انا درشانی ءِ کرینے، جیئے بھٹو نا نعرہ غاتے اٹ پنوک آ توار کراچی و حیدرآ باد خار انا سیاست کروک آتے مسترد کرینے۔ بلاول بھٹو زرداری پارے کہ بلدیاتی گچین کاری تے کٹوک آ غٹ جیالہ اومیتدار آتا زمواری ءِ کہ او الس نا پت آ پورو سلنگ کن تینا گچین لائخی تا درشانی ءِ کیر۔ یات سلے کہ کراچی ٹی غٹ آن زیات یونین کونسل چیئرمین پیپلزپارٹی نا سرسہب مسنو، ارٹ میکو نمبر آ جماعت اسلامی ءِ۔

(اے پی پی)