جناح ہاؤس آ جلہو نا ٹائم لائن تون اوار کل سرجم آک پاش

اسلام آباد: 9 مئی آ جناح ہاؤس ءِ ہراتم وامر نشان کننگا‘ ٹائم لائن تون اوار کل سرجم آک پاش مسر‘ 9 مئی آ جناح ہاؤس آ شرپسند آتا جلہو نا ہوش ءِ پریفوک آ سرجم آک پاش مسنو‘ پیشیم نا 2 بجہ و 35 آن ہلیس2 بجہ و 40 منٹ اسکان بے تربڑ برانزیک زمان پارک لاہور اٹ مچ مننگ نا بناءِ کریر۔2 بجہ و 55منٹ آن ہلیس3 بجہ و 20 منٹ اسکان ڈاکٹر یاسمین راشد وایلو راہشوک لبرٹی چوک آ سر مس۔4 بج و 5 منٹ آ برانزیک کینٹ انا رخ ءِ کریر،4 بج و 5 منٹ آ شرپسندآتا اسہ ٹولی اس شیرپاؤ برج آ سرمسوسس‘ بیگہ نا 5 بجہ و 15 منٹ آ جناح ہاؤس آاولیکو جلہو کننگا‘ جلہوگیر تا کچ 25 آن 30 بندغ آساڑی ئس ولے اوفتے پدی دھکہ تننگا۔5 بجہ و27منٹ آ شرپسند آک بھلو کچ اسے ٹی دوارہ جناح ہاؤس آ جلہوکریر،5 بجہ و 30 منٹ آن ہلیس 6 بجہ اسکان دا شرپسند آک جناح ہاؤس اٹ پرغ بٹ کرسا اودے بھاز نسخان رسیفیر۔ 6 بجہ و 7 منٹ آ جناح ہاؤس ءِ پورو خاخر تننگا،6 بجہ و 10 منٹ آ فورٹریس آن شرپسند آتیکن پین کمک جناح ہاؤس آ رسینگا‘ ہرافک بھسکاری ٹی تینا بشخ ءِ شاغار‘ 6 بجہ و13 منٹ آ اسہ پین ٹولی اس دھرم پورہ غان جناح ہاؤس آسر مس۔6بجہ و 30 منٹ آن ہلیس 7 بجہ و 55منٹ اسکان 2 ہزار نا کچ بندغ آک اسیجا جناح ہاؤس ءِ پورو وڑ اٹ بھس کریر و بھسکاری نا دا چر 8 بجہ اسکان برجا سلیس۔ داڑتون اوار شرپسند آک ملٹری انجینئرنگ سروسز نا دفتر آ ہم جلہو کرسا بھس کاری کری۔ داڑتون اوار ملک انا ایلوعلاقہ غاتے ٹی دوسَد آن زیات ہند آتیا مسہ گھنٹہ اسکان دا شرپسند آک ملک اٹ پرغ بٹ کریر ہرافتے مچ آ پاکستان تینا خن اٹ خنا۔ دا پت پاش مننگ آن داپیدوار مریک کہ جناح ہاؤس آ پورو ڈٹ بندی و کوآرڈینیشن اٹ منظم وڑ اٹ جلہوکننگاسس۔ ہراٹی منہ شرپسند راہشون نا براہ راست بشخ ہلنگ و راہشونی ہم اوار ئس۔

(آن لائن)