پاکستان ءِ ہچ گہس ڈیفالٹ مننگ کن الیپنہ، اسحاق ڈار

اسلام آباد : بنجائی وزیر خزانہ سینیٹر اسحاق ڈار اسہ وار ولدا دا عزم انا درشانی ءِ کرینے کہ پاکستان ءِ ڈیفالٹ مننگ کن الیپنہ‘ گچین ڈٹ بندی و مشکل فیصلہ غاتیان ملک زرگزرانی سوگوی دوئی کیک۔ تدوک آ دے میڈیا تون ہیت وگپ کرسا او پارے کہ عمران خان مسہ نیم سال اسکان ڈٹ بندی اٹ پاکستان ءِ زرگزرانی وڑ اٹ بھس کننگ نا کوشست کرے ولے اللہ تعالیٰ نا فضل مس کہ وخت آ فیصلہ کننگ آن پاکستان ءِ زرگزرانی بھس مننگ آن بچفین۔ او پارے کہ مسکوہی حکومت اٹ عمران خان مچ آ مسلم لیگ (ن) تون بیرہلوک کارروائی کرے‘ او پارے کہ میاں نواز شریف آن ہلیس مریم نواز، میاں شہباز شریف آن ہلیس حمزہ شہباز تون اوار مچ آ مسلم لیگ (ن) نا برخلاف بیر ہلوک کارروائی کننگا‘ ہرانا سوب آن زرگزران بھس مس۔ وزیر خزانہ پارے کہ کن تون ہرا وڑ بیرہلوک کارروائی کننگا اونا درور رسینگپک۔ کنا 45 سال متکن آ اُراءِ نیلام کننگ نا کوشست کننگا‘ اوپارے کہ کنا اکاؤنٹ آتے منجمد کننگا‘ کنا خاہوت نا خیراتی ادارہ ءِ بھس کننگ نا کوشست کننگا‘ ملک ءِ زرگزرانی وڑاٹ سوگو کننگ نا خذمت آتا بھرم ءِ اشتہاری کرسا بننگا۔ اوپارے کہ عمران خان و اوناکمکار آک تیان بیر ہلوک کارروائی تا سوب آن ملک انا زرگزران ءِ بھس کریر ہرادے بحال کننگ کن داسہ ننے مشکل ءُ فیصلہ کروئی تمنگ ءِ۔ اوپارے کہ مسلم لیگ (ن) پاکستان ءِ جوڑ کروک آ جماعت ءِ و میاں نواز شریف نا کماشی ٹی ہندا جماعت پاکستان ءِ بچفک۔ اومستی پارے کہ شہباز شریف و اونا مچ کابینہ 18‘ 18 گھنٹہ کاریم کننگ اٹی ءِ‘ نن زوت سیاسی سوگوی تون اوار زرگزرانی سوگوی ہم دوئی کینہ۔

(آن لائن)