پاکستان و سعودیہ نا روڈ ٹو مکہ ڈٹ انا مفاہمت نا یادداشت آ دستخط

اسلام آباد : پاکستان و سعودی عرب روڈ ٹو مکہ ڈٹ انا بابت مفاہمت نا یادداشت آ دستخط کریر۔ یادداشت آ دستخط کننگ نا دود اسلام آباد اٹ اڈہلک‘ ہراٹی وزیراعظم محمد شہبازشریف تون اوار ایلوفک بشخ ہلکر۔ وزیرداخلہ رانا ثناء اللہ و سعودی عرب نا نائب وزیرداخلہ ڈاکٹر ناصر بن عبدالعزیز الداؤد سمجھوتہ غادستخط کریر۔ معاہدہ حاجی تیکن امیگریشن نا عمل ءِ آسان کننگ کن کسر نا نشان مریک۔ اسلام آباد اٹ اسہ ٹرمینل اس سعودی امیگریشن و کسٹم کمامدار آتیکن جتا کننگک‘ روڈٹومکہ پروجیکٹ نا کمک اٹ حاجی تا کسٹم وامیگریشن پاکستان اٹ مریک۔ پروجیکٹ اٹ اوار حاجی تے سعودی ایئرپورٹ آتیا کسٹم و امیگریشین آن استثنیٰ مری و حاجیک چنکو وخت اسے ٹی سعودی ایئر پورٹ آتیان تینا رہینگ ہند تیا راہی مریرہ۔ وزیرداخلہ رانا ثناء اللہ خان دا وخت آپارے کہ دا ڈٹ پاکستانی حاجی تے بھاز کمک و آسودہی فراوان کرینے و دا رد اٹ نن سعودی حکومت نا منتوار ان۔ سعودی نائب وزیرداخلہ پارے کہ سعودی عرب نا استخواہی ئس کہ دا ڈٹ انا بنا کل آن مست پاکستان آن کننگے‘ نن کوشست کننگ اٹی ان کہ سعودی سفارتکار نا 2011 ٹی خون نا باندات ءِ ایسر اسکان سر کننگے و دوبہ دار آتے سخت سزا تننگک۔ وزیرداخلہ سعودی نائب وزیرداخلہ غان سعودی جیل تے ٹی چنکا ڈوہ تے بند پاکستانی شاری تے یلہ کننگ نا بابت ارفے تو سعودی نائب وزیر پارے کہ 108 پاکستانی شاری ءِ یلہ کننگانے وخت اس کہ کیہی بندی تا کیس تا جاچ ءِ ہلنگ انگ ءِ۔ سعودی نائب وزیرداخلہ دا وڑ انا بندی تے زوت یلہ کننگ نا باور کرفے‘ اسیجائی چیلنج آتتون مون تننگ کن ہڑتوم آ ملک آتا وزارت داخلہ غاتا نیام اٹ کوآرڈینیشن ءِ پین گچین کننگ آ امنا کننگا۔ داکان گڈ بنجائی وزیرداخلہ رانا ثناء اللہ خان سعودی عرب نا نائب وزیرداخلہ و ڈل اکن پیشیم نا ارغ کرے۔

(آن لائن)