9 مئی نا زمورا آتے امر کہ مرے سزا تننگک، آرمی چیف

راولپنڈی : آرمی چیف جنرل سید عاصم منیر پارینے کہ دوارہ کس ءِ ہم شہید و اوفتا یاتگار آتا بے حرمتی کننگ نا ہچ گہس موکل تننگپک‘ شہید آک ننا ہیروک ءُ‘ پاکستانی الس نا است آتے ٹی شہید آتا عظیم آ ہند مدام برجا سلک۔ 9 مئی یوم سیاہ آ قوم انا توہین کروک کل زموار آتے ہر حال اٹ انصاف نا کٹہرے ٹی سلفنگے۔ آئی ایس پی آر نا رد اٹ آرمی چیف چار شنبے نا دے سیالکوٹ گیریژن نا دورہ ءِ کرے۔ گیریژن بننگ آ آرمی چیف شہید آتا یاتگار آ پھل شاغا و شہید آتے خراج عقیدت پیش کرے ہرافک قوم انا گمر‘ عزت ووقار کن تینا جان تے ندر کریر۔ آرمی چیف پارے کہ شہید آک ننا پیشانی تیا جرکرہ‘ ہرافتتون آخرت اٹ بھلو ہند اسے نا قول کننگانے۔ پاکستانی الس نا است آتے ٹی شہید آتا عظیم آ قربانیک مدام یات سلرہ۔ ریاستِ پاکستان سلہہ بند فوج کل شہید و اوفتا خاہوت آتے مدام مقدم تخک و آخبتی وڑ اٹ اوفتا عظیم آقربانی تے بھاز شرف و قدر ایتک۔ آرمی چیف پارے کہ کس ءِ ہم شہید و اوفتا یاتگار آتا بے حرمتی کننگ نا اسُل موکل تننگپک‘ شہید آک سلہہ بند فوج‘ کانود نافذ کروک ادارہ‘ سرکاری کارندہ و پاکستان نا الس کن حوصلہ و گمر نا سوب ءُ۔ آرمی چیف دا ہیت آ زور شاغا کہ زوت آتیٹ اسہ منظم ڈٹ بندی نا رد اٹ پیش بروک واقعہ غاتا دوارہ ہچ گہس موکل تننگپک۔ آرمی چیف رینک اینڈ فائل نا مون آ دا عزم انا اسہ وار ولدا درشانی ءِ کرے کہ یوم سیاہ 9 مئی آ قوم انا توہین کروک کل زموار آتے ہر حال اٹ انصاف نا کٹہرے ٹی سلفنگک۔ آرمی چیف فارمیشن تا خواری‘ استخواہی‘ بھلا حوصلہ و کسبی چاہنداری نا ستاءِ کرے۔ افسر و ورناتتون ہیت وگپ کرسا آرمی چیف فوج انا کسبی چاہنداری و تہہ وپیشن نا چیلنج‘ غوغا وار فئیر تون مون تننگ کن ہر وڑ انا تیاری آ چکار کننگ آ زور شاغا۔ آرمی چیف نا بننگ آ کمانڈر گجرانوالہ کور اودے بخیر کرے۔