کوئٹہ تون اوار مچ آ بلوچستان یخ انا پلویڑ اٹ، آسراتی تا کاختی

کوئٹہ: کوئٹہ دامان تون اوار مچ آ بلوچستان نا بڑزکو ضلع غاک و قطبی کنڈ تدوک آ کیہی دے آن یخ انا پلویڑ اٹی ءِ، صوبہ نا چندی علاقہ غاتیٹی گوریچ نا سوب آن یخ اٹ ودکی مرسا ہنانے۔ بھلا یخ انا سوب آن دیر انا پائپ آک برف تینو، و ٹینک تا پائپ آک پنانو، و دے درست چھت آتیان دیر چُرنگ اٹی ءِ۔ گیس پریشر اٹ کمتی و لوڈ شیڈنگ نا سوب آن مخلوق نا خواریک پینج ودانو۔ کوئٹہ نا چندی علاقہ غاتیٹی گیس انا مفننگ و پریشر اٹ کمتی نا برخلاف سیاسی جماعت و علاقہ نا شاریک برانز کرینو۔ محکمہ موسمیات نا رد اٹ مچ آ صوبہ نا گیشتری ضلع غاتیٹی یخ ہندن برجا سلک، و پر انا گمان اف۔ کوئٹہ ٹی درجہ حرارت کم آن کم منفی 9، زیارت منفی11، و قلات اٹی درجہ حرارت ہچ مف منفی 10 ڈگری سینٹی گریڈ ریکارڈ کننگا۔ بلوچستان نا گیشتری علاقہ غاتیٹی درجہ حرارت تفنگ نا کچ آن شیف ہنانے، داڑسکان کہ ڈور تا دیرک ہم تفینو۔ صوبہ نا اسہ ڈویژن اسے ٹی ہم درجہ حرارت ڈبل فگر اٹ متنے۔ سویلی بلوچستان، قطبی بلوچستان تون اوار پٹ و کرّکی علاقہ غاک ہم یخ انا پلویڑ اٹی ءُ۔ رخشان ڈویژن نا باسن انگا ریک و ڈاک انا علاقہ غاتیٹی ہم ٹمپریچر تفنگ نا کچ آن شیف تمانے۔ نوکنڈی منفی 05 وخت اس کہ دالبندین نا درجہ حرارت منفی 05 ڈگری سینٹی گریڈ اسکان تمانے۔ ساراوان اٹی مستونگ مائنس 10، وخت اس کہ پشین و چمن منفی 7، مسلم باغ، پنجگور و ژوب منفی 6 وخت اس کہ خاران و لورالائی ٹی ٹمپریچر مائنس 3 ڈگری اسکان ریکارڈ مس۔ محکمہ موسمیات نا رداٹ بروک آ منہ دے اسکان رخشان، جھالاوان، ساراوان، مکران، نصیر آباد و کوسٹل بیلٹ اٹی ہم مُد انا ہندن یخ سلنگ نا گمان ءِ۔ بے وڑ موسم نا سوب آن ماہی گیر آتے ہم سوردریاب اٹ ہنپننگ نا پارت کننگانے۔

(آن لائن)