نگران سیٹ اپ کن قومی اسمبلی ٹی پدی کاوہ، عمران خان

لاہور: چیئرمین پی ٹی آئی عمران خان پارینے کہ نگران سیٹ اپ کن قومی اسمبلی ٹی پدی ہنوئی تمک، شہباز شریف نا تغ تے خراب کینہ۔ داسہ آئی ایم ایف تون دافتا مذاکرات آک سرسہب مفسہ۔ باجوہ ڈاکٹرائن اٹی داسکان ہچ ءُ کمتی اس بتنے، ملک انا ساڑی حالیت آتے سوگو حکومت اس ایسر کننگ کیک، مارچ یا اپریل اٹی لس گچین کاری تا گمان پک ءِ۔ پیدوار گیشتری رسینگتو تو مخلوط حکومت ہم جوڑ کپرہ۔ داہیت آتا درشانی ءِ مسکوہی وزیراعظم عمران خان سینئر صحافی تتون ہیت و گپ کرسا کرے۔ عمران خان پارے کہ حکومت ءِ تدوک آ نن پٹرول نا نہاد آتے ودفوئی ئسکہ، ولے ودفتو تا۔ داسہ بھاز خراب گٹ مسنے، و دا وڑ اٹ آئی ایم ایف تون اونا شڑت آک پورو مفسہ۔ دا آئی ایم ایف نا پروگرام آ عمل کننگ کتوس، دن انگا پروگرام آتے کن پبی ءُ حکمت عملی اسے نا گرج مریک۔ ہرا ساڑی حکومت تون اف۔ عمران خان پارے کہ شہباز شریف نا تغک کارہ داسہ، و دا حکومت پہہ مفننگ اٹی ءِ کہ امر کے؟ انتئے کہ داسہ دا الس اٹ ہننگ نا وڑ اٹ افس۔ اوفتتون اسٹ انگا کسر شفاف گچین کاری نا سلوک ءِ۔ او پارے کہ نگران سیٹ اپ جو ڑکننگ کن قومی اسمبلی ٹی ہننگ نا سجفنگ اُٹ، دا بابت حکمت عملی و سلاہ سوج برجا ءِ۔ پلان جوڑ کننگانے۔ قومی اسمبلی ٹی ہنتون تو دا راجہ ریاض تون اسٹ مرسا نگران حکومت جوڑ کیرہ، ہراٹی اخلاقیات نا پش اس ہم مفرو ءِ۔ عمران خان پارے کہ مسلم لیگ (ن) نا ایم این ایک ننے حال حوال کننگ اٹی ءُ، اول اوفتا ٹیسٹ ءِ کننگک، ولدا اوفتے پارٹی ٹی ہرفنہ۔ جے آئی ٹی زور شاغنگ انگ ءِ و کنے پورو دراخ جوڑ مننگ کن داسکان اِرا ہفتہ درکار ارے۔ اسہ سوج اسے نا ورندی ٹی او پارے کہ مسکوہی آرمی چیف جنرل ریٹائرڈ باجوہ ڈاکٹرائن اٹی ہچ ءُ کمتی اس بتنے، وخت اس کہ پی ٹی آئی نا کراچی ٹی با تننگ تنظیم نا نزوری و پیپلزپارٹی نا دھاندلی نا سوب آن ءِ۔ عمران خان پارے کہ مارچ یا اپریل اٹی لس گچین کاری تے خننگ اُٹ، و اگہ پیدوار گیشتری رسینگتو تو مخلوط حکومت ہم جوڑ کپنہ، عمران خان پارے کہ ملک انا ساڑی حالیت نا ویل آتے سوگو حکومت ایسر کننگ کیک۔ مستین ءِ گیرام کرسا مفاہمت نا کنڈ آ ہننگ جوان ءِ۔ او پارے کہ سندھ اٹی ننا تنظیم نزور ءِ، و پیپلز پارٹی دھاندلی آن بیدس سرسہب مننگ کپک۔ ٹروتھ اینڈری کنسیلیشن کمیشن جوڑ مس تو پی ڈی ایم تون ہیت مننگ کپک، ولے ٹروتھ اینڈری کنسیلیشن کمیشن اٹی اسٹیبلشمنٹ نا بابت ہیت مننگ کیک۔

(آن لائن)