بلوچستان اٹ اِراسال آن پولیو کیس رپورٹ متنے، عبدالعزیز عقیلی

کوئٹہ: چیف سیکرٹری بلوچستان عبدالعزیز عقیلی پارینے کہ بلوچستان الس و خاص کر پولیو نا برخلاف مہم اٹی زمواری سرتروک آ فرنٹ لائن ورکرآتا سوب آن تدوک آ اِراسال آن مچ آ صوبہ ٹی پولیو نا ہچ ءُ کیس اس رپورٹ متنے، داخیال آتا درشانیءِ او کوئٹہ ٹی 7 دے ئی پولیو تور مہم نا بناءِ کننگ نا وخت آ میڈیا تون گپ و تران کرسا کرے۔ داوخت آ چیف سیکرٹری چناتے پولیو آن بچفنگ نا پڑی کُنفسا مچ آ بلوچستان اٹی ہفت دے ئی پولیو تور مہم نا بنا ءِ کرے۔ اوپارے کہ مہم اٹی 25 لکھ 99 ہزار آن زیات چناتے پڑی کُنفنگ نا ہدف ءِ مقرر کننگانے، پولیو مہم اٹی 11 ہزار آن زیات ٹیم بشخ ہلیرہ، سال اٹی کیہی وار مہم چلیفنگک، ہر وار مخصوص ضلع غاتیٹی مہم چلیفنگاکہ ولے داوار مچ آ بلوچستان اٹی مہم نا بناءِ کننگانے۔ چیف سیکرٹری پارے کہ الس و خاص وڑاٹ فرنٹ لائن ورکرآتا سوب آن بلوچستان اٹی اِراسال آن کیس رپورٹ متنے۔ اوپارے کہ شرپسند آتا جلہو آتیان پد ہم فرنٹ لائن ورکرآک پولیو مہم آن پدی متنو، پولیس ایف سی و ایلو کارندہ غاتا کوشست آتیان پولیو ٹیم تے گچین سیکورٹی فراوان کننگ انگ ءِ۔ نصیر آباد تون اوار نوکاپ زہمی علاقہ غاتیٹی بحالی کن گچین گام گیج کننگا، پی ڈی ایم اے این ڈی ایم اے زہمی تا بحالی کن تمبو و ایلو المی آ گڑافراوان کننگانے۔ اوپارے کہ پنجاب حکومت اِرالکھ خولم نا گونی فراوان کننگ نا عمل برجاءِ، پنجاب و سندھ آن بلوچستان اٹی خولم نا پیدوار کم ءِ، خولم نا تنکی تینا خود آن تنکی اس ہم ارے۔ اوپارے کہ نُت انا تنکی ءِ بھلو حداسسکان کنٹرول کننگانے، موسمی حالیت آتیکن کنٹرول کن پی ڈی ایم اے و ایلو ادارہ غاک الرٹ ءُ۔ اوپارے کہ 60 آن 70سال آن بلوچستان آن گیس انا گرج آک پورو مسرہ، ماہی گیر آتا ہیلتھ کارڈ آتا زوت جاری کننگ نا بناءِ کننگک۔ ساڑی آ نوکاپ اٹی بحالی کن پاکستان ءِ 12 بلین ڈالر نا گرج ءِ وخت اس کہ بلوچستان اٹی نوکاپ آن زہمی تا بحالی کن 2.3 بلین ڈالر نا گرج ءِ۔ جنیوا کانفرنس اٹی پڑوکروک آ زر آن بلوچستان اٹی بحالی کن گام گیج کننگک۔

(اے پی پی)