بابو رحیم نا اُرا غا چھاپہ، بڑزکو کہولی کمیٹی اس ٹہیفنگے، بی این پی

کوئٹہ: بلوچستان نیشنل پارٹی نا بنجائی سینئر نائب صدر ملک عبدالولی کاکڑ و صوبائی اسمبلی نا باسک و پبلک اکاؤنٹس کمیٹی نا چیئرمین اختر حسین لانگو پارٹی نا صوبائی اسمبلی نا باسک صوبائی وزیر بابو رحیم مینگل نا اُرا غا سادہ وردی بینوک کارندہ غاتا کنڈ آن دیوال آتیان جُپنگ، چھاپہ خلنگ نا چادر چار دیوالی نا تقدس ءِ لتاڑ کننگ نا مذمت ءِ کرسا پارینے کہ آئی جی پولیس و حکومت تون اوار ادارہ غاک داسکان دا کارروائی نا بابت جاست پاست کرسا راستکی تے مونی اتنگتنے، بڑزکو کہولی کمیٹی ٹہیفسا جاست پاست کرسا راستکی تے الس نا مون آ اتنگے، آخا تو ایلو جماعت پارلیمنٹ تون اوار اوار ہر تعلقدار فورم آ توار چست کرسا برانز کیک۔ و ولدا حالیت آتا کل زمواری حکومت و تعلقدار کمامدار آتیا بریک۔ دا ہیت آتا درشانی ءِ او دو شنبے نا دے کوئٹہ پریس کلب اٹی ٹکری سفر خان رند و ایلو سنگت آتا بی این پی ٹی بننگ نا رد اٹ اڈ تروک پریس کانفرنس نا وخت آ کرے۔ دا وخت آ صوبائی اسمبلی نا باسک شکیلہ نوید دہوار، غلام نبی مری، موسیٰ جان بلوچ، جمال لانگو، شمائلہ اسماعیل تون اوار ایلوفک ہم ساڑی ئسر۔ ملک عبدالولی کاکڑ ٹکری سفر خان رند ءِ جماعت اٹ بننگ آ مبارکبادی ترسا اومیت درشان کرے کہ او جماعت نا سوگوی کن تینا کڑد ءِ ادا کیک۔ اینو صوبہ نا کنج کنج آن مخلوق کیہی درزن بندغ پارٹی ٹی بننگ اٹی ءُ۔ ہرانا پیدوار شاہدی بی این پی نا صوبہ نا حقی حق آتا دوئی کننگ و الس نا ویل آتا ایسری کن جہد اوار ءِ۔ و ایماندار بانی راہشون سردار عطااللہ مینگل نا نظریہ و مشن ءِ سر تننگ کن پارٹی ٹی برسا جہد کیر، و ہر وڑ انا قربانی کن سنبرینگوک مریر۔

(آن لائن)