پاکستان پیپلز پارٹی نا مرتضیٰ وہاب کراچی نا میئر گچین مس

کراچی :  پیپلز پارٹی نا مرتضیٰ وہاب 173 وونٹ ہلسا میئر کراچی گچین مس‘ کراچی نا میئر کن پیپلزپارٹی نا اومیتدار مرتضیٰ وہاب و جماعت اسلامی نا حافظ نعیم نا نیام اٹ گو مس ہراٹی مرتضیٰ وہاب ءِ 173 وونٹ رسینگاوخت اس کہ حافظ نعیم 160 وونٹ ہلک دا وڑ مرتضیٰ وہاب 13 وونٹ زیات ہرفسا کراچی نا میئر گچین مس ولے نتیجہ نا پک پڑو ءِ الیکشن کمیشن کیک۔ صوبائی وزیر و پیپلزپارٹی کراچی ڈویژن نا صدر سعید غنی پارینے کہ اینو میئر نا گچین کاری تا نتیجہ پیدوار ءِ۔ پنچ شنبے نادے آ تینا ٹویٹ اٹی صوبائی وزیر پارے کہ پاکستان پیپلزپارٹی میئر وڈپٹی میئر نا گچین کاری مہم اٹی اِرا وار تینا کارندہ غاتے یکجا کرے، ہڑتوم آ وارخواہی تیا باسک آتا حاضری 100 درسد ئس۔ پیپلزپارٹی کراچی ڈویژن نا صدر سعید غنی پارے کہ حافظ نعیم اسہ وار اس ہم تینا کارندہ غاتے اسہ ہند اسے آ جمع کننگ کتنے داڑان اینو نا نتیجہ پیدوار مسنے۔ مسکوہی صدر آصف علی زرداری سندھ اٹی غٹ میئر و ڈپٹی میئرآتے مبارکبادی تسنے۔ آصف علی زرداری پنچ شنبے نادے آ مرتضیٰ وہاب ءِ کراچی نا میئر گچین مننگ آ مبارکبادی ترسا پارے کہ گچین مروک بلدیاتی نمائندہ غاتا سرسہبی کارندہ غات خواری نا بھرم ءِ۔ پیپلزپارٹی نا جیالہ میئرآک الس نا خذمت نا آب ءِ برجا تخرہ۔ اوالسی نمائندہ غاتے پارت جاری کرسا پارے کہ اوتینا دفتر نا درگہ غاتے الس کن یلہ تخر و اینو آن تینا کاریم نا بناءِ کیر۔ ایلو کنڈ آ الیکشن کمیشن سیکرٹریٹ اسلام آباد اٹی سندھ اٹی میئر، ڈپٹی میئر، چیئرمین، وائس چیئرمین نا گچین کاری تا چاروکی کن بنجائی کنٹرول روم و غاو سیل جوڑ کننگانے۔ بنجائی کنٹرول روم گچین کاری عمل نا مانیٹرنگ و غاوتا پوروی کن جوڑ کننگانے۔ کنٹرول روم سہب انا 8 بجہ غان پگہ 16 جون سہب انا 8 بجہ اسکان بے سلنگ آن کاریم کرے۔ بنجائیکنٹرول روم آن سینئر آفیسر مانیٹرنگ ٹیم اتون اوار بے سلنگ آن سندھ اٹی میئر، ڈپٹی میئر نا گچین کاری عمل نا چاروکی ءِ کرے۔

(مانیٹرنگ ڈیسک/ اے پی پی)