آذر بائیجان ہر تُو آ پاکستان ءِ کم نہاد آ ایل این جی فراوان کیک

باکو : پاکستان و آذربائیجان نا نیام اٹ چندی بشخ آتے ٹی کمک ءِ ودفنگ آ امنائی مسنے‘ آذربائیجان نا صدر الہاف عالیوف تون اسیجا پریس کانفرنس اٹ وزیراعظم شہبازشریف پارے کہ آذر بائیجان نا ائیر لائن اسلام آباد کن پرواز نابناءِ کننگ اٹی ءِ‘ آذربائیجان نا آذر ائیر لائن اسلام آباد و کراچی کن اِرا جہاز چلیفک۔ داکان بیدس پاکستان و آذربائیجان تین پہ تینی واپار و چندی بشخ آتیٹی کمکاری ءِ ودفنگ آ امنا کرسا پارینو کہ ساڑی آ چیلنج آتون مون تننگ کن اواری اٹ کاریم کروئی مریک۔ پنچ شنبے نادے آ وزیراعظم محمد شہباز شریف آذربائیجان نا 2 دے ئی سرکاری دورہ ٹی آذربائیجان نا صدر الہام علیوف تون اودہی کرے اوکان پد ہڑتوم آ راہشونک اسیجائی پریس کانفرنس آن تران کریر۔ وزیراعظم محمد شہباز شریف پارے کہ گوادر نا کمک اٹ خڑک انا ملک آتون واپار نا بھلو وارخواہی ا س ساڑی ءِ۔ پاکستان اٹ شمسی توانائی ءِ مون آ دننگ و ہڑتوم آ کنڈآتا واپار نا کچ اٹ ودکی نا خواہندار ءِ، نن آذربائیجان ءِ پاکستانی برنج انا برآمد اٹی ودکی خوانہ۔ اوپارے کہ آذربائیجان نا قومی ایئرلائن اسلام آباد کن جہاز آتا بناءِ کننگ اٹی ءِ۔ او پارے کہ آذربائیجان قدرتی وسیلہ غاتیان شُپ ملک اسے، روس یوکرین جھیڑہ نا سوب آن جہانی کہول آ گڑاتا نہاد آتیٹی ودکی مسنے، ساڑی آ دور انا چیلنج آتون مون تننگ کن اواری اٹ کاریم کروئی مریک۔ وزیراعظم محمد شہباز شریف پارے کہ او آذربائیجان نا دورہ ءِ کرسا بھاز خوشی محسوس کننگ اٹی ءِ۔ اوپارے کہ او صدر آذربائیجان نا وژن آن بھاز زہمی ءِ، آذربائیجان تون تعلقداری تا مون آ دننگ ءِ اہم تکنہ، آذربائیجان و پاکستان نا نیام اٹ متکن آ ایلمی تعلقداری ءِ۔ وزیراعظم محمد شہباز شریف بھارت نا غیرکانودی کوزہ ٹی جموں و کشمیر نا حالیت آتے تالان کرسا پارینے کہ بھارت نا غیرکانودی کوزہ ٹی جموں وکشمیر نا الس ہفت دہائی آن زیات وخت آن بھارتی ظلم انا گواچی ءُ۔ وبھارت نا غیر کانودی کوزہ ٹی جموں وکشمیر نا جھیڑہ غا آذربائیجان نا کنڈآن مدام پاکستان نا موقف نا تائید ناستاءِ کرے۔ وزیراعظم محمد شہباز شریف آذربائیجان نا صدر ءِ دورہ پاکستان نا سلہ ہم خلک۔ آذربائیجان نا صدر الہام علیوف پارے کہ اوڑدہی ٹی تین پہ تینی واپار اٹ ودکی آ امنا مسنے۔ اوپارے کہ ہڑتوم آ ملک آتیٹی چندی بشخ آتیٹی کمکاری ءِ ودفنگ نا وارخواہی ساڑی ءِ۔ اوپارے کہ اوڑدہی ٹی تعلیم، دفاع و توانائی نا بشخ اٹی تین پہ تینی کمکاری ءِ مون آ دننگ آ ہم گپ وتران مس۔ او ہڑتوم آ ملک آتا الس نا گچینی کن اواری اٹ کاریم کننگ نا عزم انا درشانی ءِ کرے۔ آذربائیجان نا صدر وزیراعظم محمد شہباز شریف نا دورہ نا خیرمقدم ءِ کرسا پاریکہ دفاعی لائخی تے گچین کننگ کن اسیجائی فوجی مشق آتیٹی ودکی کننگک۔

(اے پی پی)