بلوچستان، اورماڑہ ٹی سمندری ریسہ غاک بڑز، دِیر اُراتیٹی پترینگا

کوئٹہ : اسسٹنٹ کمشنر سب ڈویژن پسنی، اورماڑہ محمد جان پارینے کہ بلوچستان نا کرکی علاقہ و اورماڑہ ٹی سمندری ریسہ غاتا بڑز مننگ نا سوب آن دِیر اُراتیٹی پترینگانے۔ محکمہ موسمیات نا کمامدارآک پارینو کہ سمندری طوفان اینو ہچ خبر اف ہراتم پاکستان نا کرک تون ڈوک لگے، داکان مست حکومت گوادر، پسنی جیونی ٹی الرٹ جاری کرینے، کرکی پٹی آ نئے بیرہ سمندری ریسہ غاک بڑز مننگ کیرہ بلکن ترند تہو تتون پِر انا ہم گمان ءِ۔ اسسٹنٹ کمشنر سب ڈویژن پسنی، اورماڑہ محمد جان پارینے کہ بلوچستان نا سمندری دنگ اٹ تدوک آ دے آن سمندری ریسہ غاتا بڑز مننگ آن اورماڑہ ٹی دِیر اُراتیٹی پترینگا حوا ل ملنگ آ ضلعی انتظامیہ و پی ڈی ایم اے نا کارندہ غاک زہمی خاہوت آتے رکھ ہند آ گدریفینو۔ اوپارے کہ ہروڑنا ہلہلہ ئی حالیت آتون مون تننگ کن جتا ءُ جاگہ سے آ ٹینٹ خلنگانے، ہراڑے مخلوق ءِ ہلہلہ ئی حالیت آتیٹی گدریفنگ مریک۔ بحیرہ عرب آن بش مروک آ سمندری طوفان بپرجوائے کیٹی بندر آن 181، کراچی آن 247 وخت اس کہ ٹھٹھہ غان 267 کلومیٹر نا فاصلہ غا سویل اٹی ساڑی ءِ۔ طوفان نا اینو پیشیم آ کیٹی بندر و انڈین گجرات آن گدرینگ انگ نا گمان ءِ۔ نیشنل ڈیزاسٹر مینجمنٹ اتھارٹی نا رداٹ سمندری طوفان نا گمانی اثرآتیٹی ترند تہو، پِر و نوکاپی کیفیت اوار ءِ۔ غٹ تعلقدار ادارہ غاک ہائی الرٹ ءُ۔ ہروڑنا ہلہلہ ئی حالیت آتیٹی شاریک تعلقدار انتظامیہ تون رابطہ کیر و اوناپارت آتیا عمل کیر۔ ایلو کنڈ آ محکمہ موسمیات نا رداٹ بروک آ 24 گھنٹہ ٹی بلوچستان نا گیشتر علاقہ غاتیٹی موسم بارن و پرکپک ولے صوبہ نا کرکی علاقہ غاتیٹی ہورہ و گروک و ترند تہو اٹ پِر انا گمان ءِ، محکمہ موسمیات نا کنڈآن جاری بیان اٹی پاننگانے کہ بروک آ 24 گھنٹہ ٹی بلوچستان نا گیشتر میدانی علاقہ غاتیٹی موسم بھاز باسن و جمری سلک وخت اس کہ کرکی علاقہ، گوادر، پسنی، جیونی، اورماڑہ، بارکھان، خضدار، لسبیلہ، خاران، آواران، اوتھل اٹی ہم تہو و ہورہ و گروک اٹ پِر و منہ ہند آتیا ترونگڑ نا گمان ءِ، تدوک آ دے غٹ آن زیات درجہ حرارت تربت اٹی 44، دالبندین اٹی 43 ڈگری سینٹی گریڈ ریکارڈ کننگا۔ ساڑی آ سمندری طوفان نا رداٹ محکمہ موسمیات شاری تیان بے گرج سفرآن پاننگ کننگ نا مشورہ تسنے۔

(اے پی پی)