وزیر اعظم نا یوتھ پروگرام ستا کڑزوک ءُ گام اسے، گورنر ولی کاکڑ

کوئٹہ : گورنر بلوچستان ملک عبدالولی خان کاکڑ پارینے کہ وزیراعظم پاکستان یوتھ پروگرام نا رد اٹ صوبائی دارالحکومت کوئٹہ ٹی چندی ضلع غاتا ٹیم تا نیام اٹ والی بال میگا ایونٹ گو تا اڈ تننگ نا ستاءِ کرینے‘ دارد اٹ بنجائی حکومت بلوچستان نا ورناتے ہر وڑ انا آسراتی فراوان کننگ اٹی ءِ۔ وزیراعظم پاکستان ٹیلنٹ ہنٹ پروگرام پوسکن آچین انا جوان ہیلکاری نا سوب مریک‘ اوپارے کہ نن تینا کل گوازی گرتیا گمر کینہ‘اومیت کینہ او آخبت اٹ ہم قوم انا کاٹم ءِ گمر آن بڑزا کیرہ۔ دا خیال آتا درشانی ءِ او تدوک آدے صوبائی دارالحکومت کوئٹہ ٹی وزیراعظم پاکستان میاں شہباز شریف نا ٹیلنٹ ہنٹ پروگرام نا رد اٹ اڈ تروک دود انا باقاعدہ بناءِ کرسا کرے۔داوخت آ گورنر بلوچستان پارے کہ بلوچستان نا پنچ ضلع غان نرینہ نیاڑی والی بال ٹیم تا بننگ ءِ پک کننگ اسہ دراخ جوڑ مننگ اصل اٹ ذہنی دراخ جوڑی نا ضمانت ءِ۔ گورنر بلوچستان پارے کہ نن تون لائخ آگوازی گر نا کمتی اف‘ بیرہ اوفتے جوان ہیلکاری وآسراتی فراوان کننگ ناگرج ءِ‘ اوپارے کہ پاکستان کیہی گیم تے ٹی جہانی چمپین مسنے و اینو ہم گوازی تا دنیاٹی پاکستان تینا کارکڑد انا بابت نمان ءُ ہند اسے آٹے۔ ساڑی حکومت گوازی تا شونداری کن کوشست کننگ اٹی ءِ و بلوچستان اٹ چندی گوازی تے ٹی استخواہی تخوک ورناتے کل آسراتی تے فراوان کننگ اٹی ءِ۔ گورنر پارے کہ گمر نا ہیت دادے کہ ننا جہانی گوازی گرک جہانی کہول آ ملک اناپن ءِ روشنا کریر۔گوازی گرک خواری‘ سوگو عزم و مستقل مزاجی نا اوصاف ودی کرسا سرسہبی دوئی کننگ کیرہ۔ گورنر بلوچستان ملک عبدالولی خان کاکڑ دا عزم کرے کہ بنجائی حکومت بلوچستان نا ورناتا کاٹم خواہی و است بڈی کننگ نا چرجوئی ءِ برجا تخک و ہر شش تُو آن پد چندی گوازی تا گو تا چر تیان نن تخلیقی ذہن مون آاتنگ کینہ۔ گورنر بلوچستان والی بال نا گو تے ٹی زالبول گوازی گر تا بشخ ہلنگ نا ستاءِ کرسا کرسا پارے کہ ہر شش آن پد میگا ایونٹ کرافنگ آن لائخ آ گوازی گرک مون آ بریرہ۔ ہندا وڑ آسراتی و وارخواہی فراوان کننگ آن ٹیلنٹ ءِ مون آ اتنگ نا چرجوئی برجا سلک۔ داوخت آ خضدار انجینئرنگ یونیورسٹی نا قائمقام وائس چانسلر سہراب خان بزنجو، بیوٹمز یونیورسٹی نا ڈاکٹر عبدالرحمن و ڈی جی گوازی درا بلوچ ساڑی ئس۔اخیر اٹ گورنر بلوچستان گوازی گر و بست وبند کروک آتے یاتگیری شیلڈ و سوینئر تس۔

(خ ن)