نیاڑی کرکٹر ناہیدہ خان ایلو گوازی گر تے کن رول ماڈل اسے، قدوس بزنجو

کوئٹہ: وزیراعلیٰ بلوچستان میر عبدالقدوس بزنجو بلوچستان آن تعلقدار جہانی نیاڑی کرکٹر ناہیدہ خان نا انٹرنیشنل کرکٹ آ ریٹائرمنٹ آ اونا پاکستان وومن کرکٹ ٹیم اکن خذمت بلوچستان نانیاڑی تیکن اسہ رول ماڈل اس مننگ و شاندار کرکٹ کیریئر نا ستاءِ کرینے۔ وزیر اعلیٰ ناہیدہ خان نا کرکٹ تون تعلقداری ءِ برجا تخسا کوچنگ نابشخ ءِ تینائی کننگ آ اوڑکن تینا نیک انگا استخواہی تا درشانی ءِ کرینے۔ وزیراعلیٰ پارینے کہ بلوچستان آن تعلقدار لائخ و ہمتی آنیاڑی کرکٹر کوچنگ ناپڑ آ ہم تینا لائخی تے کاریم اٹ اتسا پوسکن آ کرکٹر آتیکن اسہ درور اس جوڑ مریک۔ وزیراعلیٰ ناہیدہ خان نا خاہوت ءِ ہم خراج تحسین پیش کرساپارے کہ اسہ قدامت پسند راج اسے ٹی اوڑکن اونا خاہوت نا کنڈآن سپورٹ مثالی ءِ‘ او پبی وڑ اٹ قومی و جہانی کہول آ بلوچستان نا نمائندگی ءِ کرے‘ وزیراعلیٰ کرکٹ بورڈ انا کنڈآن اوڑتون ناروا رویہ غا است ہسونی درشان کرسا پارے کہ اونا ریٹائرمننگ آن پد چیئرمین پی سی بی نجم سیٹھی صوبہ ٹی نیاڑی کرکٹ نا گچینی کن اونا خذمت آتے دوئی کے و اودے اسہ ہندن ءُ ٹاسک اس تننگے تاکہ او تینے آنبار ءُ بھاز ناہیدہ خان جوڑ کے‘ وزیراعلیٰ پارے کہ دا ہیت ننا صوبہ ناگمر نا سوب ءِ کہ او جہانی کہول آ بلوچستان نا نمائندگی ءِ کرے‘ اسہ ہندن ءُ علاقہ سے آن کرکٹ نا دنیا ٹی بننگ ہراڑے نیاڑی تا اسہ بشخ اسے ٹی ہم نمائندگی اف آن حساب ءِ دا نن کل اکن گمر نا ہیت اسے۔ وزیراعلیٰ پارے کہ ناہیدہ خان پک کرے کہ بلوچستان نامسنک کس آن کم افس و نئے اوفتے ٹی ٹیلنٹ نا کمتی ارے۔ اوپارے کہ ناہیدہ خان ننا صوبہ نا میرات ءِ ہراڑا نن کل گمر کینہ۔ وزیراعلیٰ چیئرمین پی سی بی نجم سیٹھی آن ناہیدہ خان نا خذمت آتیان فائدہ ہرفنگ ناگرج آ زور شاغسا پارے کہ اگہ پاکستان نانیاڑی کرکٹ ٹیم اٹ ناہیدہ خان نا ہند جوڑ مفک تو اودے نیاڑی کرکٹ ٹیم انا منیجمنٹ نا بشخ جوڑ کننگے و اونا خذمت آتیان فائدہ ہرفنگے تاکہ بلوچستان آن تعلقدار ننا شاندار نیاڑی کرکٹر مچ آ صوبہ نا مسن تیکن ملک و صوبہ نا پن ءِ قومی جہانی کہول آ روشنا کننگ کن اسہ درور اس مرے۔

(خ ن)