بشری بی بی آخا، عمران خان پکا دزگیر مریک، رانا ثناء اللہ

اسلام آباد : وزیرداخلہ راناثناء اللہ پارینے کہ بشریٰ بی بی ءِ دزگیر کننگ نابابت خبرک راست افس‘ عمران خان المی دزگیر مریک‘ چیف جسٹس نا برخلاف ریفرنس نا تیاری تون اوار کل گڑاتیا سجفنگ انگ ءِ، سپریم کورٹ توہین عدالت نا نوٹس جاری کرے تو پارلیمنٹ تینا فیصلہ ءِ کیک۔ دوشنبے نادے صحافی تتون ہیت وگپ کرسا وزیرداخلہ رانا ثناء اللہ پارے کہ چیف جسٹس انت کرے‘ ہرا رویہ ءِ تینائی کرے اوڑا مچ آ قوم مونجاءِ‘ انصاف نا بڑز انگا ایوان اٹ تولسا کنڈ ہلنگ ءِ مخلوق سگپک‘ قومی خزانہ نا 60 ارب روپئی نا داڑیل ءِ ہرا وڑ ویلکم کننگا مخلوق بھاز خار اٹی ءِ‘ اینو ہرا برانز مننگ اٹی ءِ داٹی پک کننگانے کہ شرپسند آک فائدہ ہرفنگ کپس‘ او پارے کہ عمران خان ءِ ہر حال اٹ دزگیر کننگک۔ او ڈوہ تا مہشون اٹ 9 مئی آ ودکی مس۔ دا فتنہ مچ آسال آن انویسٹمنٹ کریکہ‘ کل ٹارگٹ پک ئس کہ ہراڑے جہاز ءِ خاخر تروئی ءِ‘ ہراڑے شہید آتا یاتگار تے خاخر تروئی ءِ‘ انصاف نا کٹہرے ٹی سلوئی تمک تے‘ ہراتم انصاف نا بھلا ایوان تے ٹی تولسا کانود نا خیالداری مف تو لس مخلوق و سیاسی کارندہ غاتیا خیالداری کرفنگ مشکل مریک۔ نگران حکومت آتے اندازہ الو کہ دا وڑ انا ہند آتیا جلہو کننگک۔گڑا چیف جسٹس نا برخلاف ریفرنس نا تیاری مننگ اٹی ءِ؟ نا ورندی ٹی وزیرداخلہ پارے کہ دا بابت سجفنگ انگ ءِ‘ مخلوق تیناسلاہ تے تننگ اٹی ءِ‘ اگہ توہین عدالت نا نوٹس جاری مس تو پارلیمنٹ فیصلہ کیک کہ انت کروئی ءِ‘ نگران حکومت آک ہمو وخت اسکان مریرہ تانکہ گچین کاریک مفس‘ اسہ پین سوج اسے نا ورندی ءِ ترسا او پارے کہ مسکوہی وزیراعظم نا اُرائی بشری بی بی ءِ دزگیر کننگ نا خبرک راست افس‘ ولے عمران خان ءِ المی دزگیر کننگک۔

(آن لائن)