قومی اسمبلی، چیف جسٹس نا برخلاف ریفرنس اتنگ نا تحریک منظور

اسلام آباد : پارلیمنٹ چیف جسٹس پاکستان نا برخلاف ریفرنس اتنگ نا پک فیصلہ کرینے۔ حوالی نا رد اٹ چیف جسٹس عمر عطا بندیال نا برخلاف ریفرنس ءِ گڈیکو دروشم تننگ کن خصوصی پارلیمانی کمیٹی ٹہیفنگک ہراٹی کل جماعت آتا باسک آک اوار مریرہ‘ وخت اس کہ کمیٹی ٹہیفنگ ناواکداری ءِ اسپیکر قومی اسمبلی ءِ تننگک‘ حوالی نا رد اٹ جماعت آتا باسک آک کمیٹی نا واکداری نا بابت مسودہ ءِ تیار کننگ اٹی ءُ و پارلیمانی کمیٹی نا ٹہیفنگ نا تحریک ءِ قومی اسمبلی ٹی پیش کننگ نا گمان ارے۔ دا رد اٹ قومی اسمبلی چیف جسٹس پاکستان نا برخلاف ریفرنس اتنگ نا منظوری ءِ تسنے۔ ایلو کنڈ آ پارلیمنٹ نا اسیجائی دیوان اٹ قومی احتساب بیورو(نیب) ترمیمی بل 2023 ءِ امنائی اٹ منظور کننگا‘ جماعت اسلامی نا سینیٹر مشتاق احمد خان ناکنڈآن پیش کروک کل ترمیم تے مسترد کننگا، نیب ترمیمی بل انا رد اٹ ہمو کل کیسک ہرا نیب انا کاریمی دنگ اٹ بفسہ اوفتے تعلقدار فورم تیا راہی کننگک۔ تحریک انصاف نا سینیٹر آک اسیجائی دیوان آن بائیکاٹ کریر‘ دوشنبے نادے پارلیمٹ نا اسیجائی دیوان اٹ بنجائی وزیرکانود اعظم نذیر تارڑ نیب ترمیمی بل ءِ ایوان اٹ پیش کرسا پارے کہ مسکوہی دور اٹ نیب اسہ تہار ءُ کانود اس ئس و فیئر ٹرائل ءِ پک کننگ کن نیب آرڈیننس اٹ ترمیم کننگا ولے تحریک انصاف نیب ترمیمی بل ءِ این آر او گوندا۔ او پارے کہ اصل اٹ نیب ترمیمی بل تحریک انصاف کن این آر او اسے‘اوپارے کہ مسکوہی دور اٹ نیب ءِ چیئرمن نیب جاوید اقبال سیاسی مسخت کن کاریم اٹ ایس و صدر تو تحریک انصاف ءِ ہرسا ہیت کیک ہندا سوب آن دستخط کتو و صدر بہانہ کرے کہ بل انا سماعت سپریم کورٹ اٹ مننگ اٹی ءِ۔ اوپارے کہ پارلیمنٹ آئین پاکستان نا رد اٹ کانود جوڑ کیک وننا کانود جوڑ کننگ نا واکداری آ ادارہ یا بندغ اس رکھ خلنگ کپک۔اوپارے کہ صدر ہم دا کانود جوڑ کروک ادارہ ءِ توننگ کپک۔ صدر پارلیمان نا بشخ اسے ولے اودے تینا واکداری تا سما اف۔ اوپارے کہ نیب ترمیمی بل اٹ ترمیم نارد اٹ کیس تے تعلقدار فورم تیا راہی کننگ مریک۔ دا وخت آ جماعت اسلامی نا سینیٹر مشتاق احمد خان بل اٹ ترمیم پیش کرسا پارے کہ نیب انا ادارہ اپوزیشن و مخالف آتا توار ءِ شیف شاغنگ کن دا کانود نا سیبو ءِ ہلسا کرے‘ا وپارے کہ کنا دز زندہ باد واونا دز مردہ باد نا نعرہ ہم لگا ہندا سوب آن داٹی ترمیم المی ءِ۔ اوپارے کہ پاور سیکٹر اٹ ارب آ روپئی تا کرپشن مس‘ہندا وڑ ایلو ادارہ غاتے ٹی ہم کرپشن مننگ اٹی ءِ‘ او پارے کہ کرپشن ءِ ہم دہشت گردی آنبار ءُ ڈوہ اس گوندنگے۔ اوپارے کہ جج آتا فرنٹ مین و اوفتا مار تا اسکینڈل آک مون آ بسر گڑا اوفتا کارروائی مننگ کیک۔او پارے کہ اینو اسکان سیاستدان خاص وڑ اٹ اپوزیشن نا برخلاف کارروائی کننگانے‘ مگہ وخت اس جرنیل تا کرپشن نابرخلاف گام ہرفنگ مریک۔ اوپارے کہ اینو اسکان جج یا جرنیل آتے پرسجو نا دنگ اٹ انتئے اتنگ تنے‘ نیب انا کانود اٹ المی ترمیم کنے ولے دادے ٹوتھ لیس جوڑ کننگپ۔ دا وخت آ اسپیکر قومی اسمبلی سینیٹر مشتاق احمد خان ناکنڈآن پیش کروک ترمیم تے ایوان اٹ پیش کرے ہرافتے گیشتری سلاہ اٹ مسترد کننگا و ا سپیکر قومی اسمبلی گیشتری ناسلاہ اٹ بل ءِ منظور کرے۔ تحریک انصاف نا سینیٹر آک پارلیمنٹ نا اسیجائی دیوان آن بائیکاٹ کریر۔

(مانیٹرنگ ڈیسک/ آن لائن)