عدالت نا اصل شرف ءِ بحال کننگ خوانہ، مولانا فضل الرحمن
ہرکس آ انصاف نا زمواری مس تو کل فریق آتیا اسہ وڑ چکار کروئی تمک، اینو نا تاریخی مچی پک کرے کہ فیصلہ الس ءِ کروئی ءِ، پی ڈی ایم سروک
اسلام آباد : پاکستان ڈیموکریٹ موومنٹ (پی ڈی ایم) نا سروک مولانا فضل الرحمان سپریم کورٹ نا پیشن آ دھرنا غان تران کرسا پارے کہ ہر کس آ انصاف نازمواری مس تو کل فریق آتیا اسہ وڑ چکار کروئی تمک۔ مولانافضل الرحمان پارے کہ نن عدالت نا کی قدر وشرف ءِ بحال کننگ خوانہ‘ اینو نا تاریخی آ مچی پک کرے کہ فیصلہ الس ءِ کروئی ءِ‘ مچ آ پولیس ورینجر اسہ کنڈ مرے نن دا سپریم کورٹ نا ماڑی نا رکھ ءِ کینہ‘ کس اس دا ماڑی آ ہننگ کپک‘ داسہ فیصلہ ءِ پاکستان نا الس ءِ کروئی ءِ۔ مولانافضل الرحمان پارے کہ اینو اسلام آباد اٹ الس نا عدالت لگوک ءِ‘ عدلیہ نا شرف تننگ نا باور کینہ‘ اسلام عدل و انصاف نا پرمان کرینے‘ پنجاب و کے پی نا اسمبلیک پرغنگتوسہ تو اینو دا تنکی متوکہ۔ داکان مست مسلم لیگ ن نا چیف آرگنائزر مریم نواز سپریم کورٹ ناپیشن آ پاکستان ڈیموکریٹ موومنٹ نا دھرنا غان تران کرسا پارے کہ چیف جسٹس صاحب، الس نا دابھلا مچی آن خوش مسس یا آخا؟ مقدمہ پین اس ئس و سوموٹو پین ہیت اسے آ ہلنگا۔ مریم نواز مستی پارے کہ نی کڑسی و طاقت ءِ غلط کاریم اٹ اتسا چار مسٹ نافیصلہ ءِ مسٹ ارٹ نا فیصلہ ٹی بدل کریس‘ اسمبلی تے پرغنگ نا زموار عمران خان و پرویزالہیٰ تون اوار عارف علوی ہم ئس۔ مریم نواز پارے کہ عمران خان نا دزگیری آ الس پیشن پیش تمتو‘ عمران خان نا دزگیری آ ہیلکار جلہوگیر آک پیش تمار‘ ہرافتے بارڈر ءِ ملسا عمران خان پاکستان آ بٹنگا و اوفتے زمان پارک اٹ جاگہ تس‘ الس تیلی و باکس ہرفپک پیش تمپک‘ عمران لسٹ جوڑ کریسس کہ اگہ ای دزگیر مسٹ تو ٹارگٹ دادے‘ عمران خان پاریسس کہ اگہ دزگیری مس تو دا ہند آتیا جلہو کروئی ءِ۔ مریم نواز چیف جسٹس ءِ پارے کہ مگہ نی عمران آن ارفیس کہ پاکستان اٹ شہید آتا یاتگار آتا انت مس؟ او 60ارب روپئی لٹسا تینا بزنس ٹائیکون سنگت نا جیب اٹ شاغا‘ ہندا 60ارب روپئی نا بدل اٹ او چارونیم سَد کینال ڈغار ہلک۔ پی ڈی ایم ارفنگ خواہک کہ ہرا گڑاغا نی داخس خوش مسس؟ ن لیگ نا راہشون پارے کہ بیدادی تے ہربو کس ءِ تاحیات ضمانت و کس ءِ تاحیات نابودی۔ یات سلے کہ پی ڈی ایم نا کنڈ آن عدالتی رویہ نا برخلاف سپریم کورٹ نا پیشن آ برانزی جلسہ کننگاسس۔
(مانیٹرنگ ڈیسک)