حالیت آتا بے چیٹ مننگ نا کل زموار ءُ، سردار اختر مینگل

اسلام آباد : بلوچستان نیشنل پارٹی نا سروک سردار اختر جان مینگل ملک اٹ ساڑی حالیت آتا زمواری ءِ سیاستدان تتون اوار عدلیہ و ملٹری و سول اسٹیبلشمنٹ آ خلسا فیکٹ فائنڈنگ کمیشن جوڑ کننگ ناخواست کرینے وخت اس کہ بنجائی وزیر ڈٹ بندی احسن اقبال چیف جسٹس نا برخلاف سپریم جوڈیشل کونسل ءِ ریفرنس راہی کننگ ناسلاہ تس‘ دوشنبے نادے قومی اسمبلی نا دیوان اٹ تینا خیال آتا درشانی ءِ کسا بی این پی نا سروک سردار اختر جان مینگل پارے کہ دا دا وخت آ ہرا واقعہ غاک مننگ اٹی ءُ دا سجفوئی ءِ کہ داامر مس۔ نن کل کاٹم اٹ ہلسا شئیر خلنگ اٹی ان کہ دا امرمس‘ انت مس و ہراتم مس‘ او پارے کہ تینا کاریم اٹ اتنگ کن بلہ ودی کننگا ولدا ہندا بلہ غاتا وخت اس کاٹم آ وخت اس دیر تے لتاڑنگا و ہرافک دا بلہ غاتے جوڑ کرینو اوفتیان ارفوک ءُ کس اس اف۔ او پارے کہ دا بلہ غاتے جوڑ کروک آک وردی ٹی ہم مریرہ و شیروانی ٹی ہم مرور ولے دا کل حالیت آتا زموار نن کل ان‘ بیرہ اسہ ادارہ دانا زموار اف۔ اوپارے کہ اینو نا حالیت آتے خننگ آن پد مخنگ نا حق ننے ہم ارے‘ ہرا حالیت آتا نشاندہی ءِ نن شست سال مست کرینہ ہمو وخت آکل ننے آ مخارہ و ہمو وخت آ ننے آ غداری نا تہمت لگاکہ۔ اوپارے کہ ملک انا آبادی تون اوار اوار نما غدار تا کچ ہم ودنگ اٹی ءِ‘ بیر عدلیہ آخا دا پارلیمنٹ ہم دو رغی کرینے۔ننا سرکڑدہ غاتے جیل کننگا۔ ہندا شاہراہِ دستور آ بلوچستان آن مسنگ پرسن تا خاہوت آک بسر‘ جج آک اوفتا چناتا توار تے خف توتوسہ اوفتے اسہ جج اس ہم تسلی تتو‘ وخت اس کہ عمران خان ءِ تو اسہ گھنٹہ ٹی پیش کننگ نا پرمان کننگا۔ اوپارے کہ لاہور اٹ سم کاری آن مست سجفرہ کہ دا ننا ایلمک ءُ گڑا بلوچستان والاک نما ایلم افس‘ ننا گدان و کچہ انگا اُراتے ہم بھس کننگا۔ اینو انصاف نا معیاردادے کہ کس ءِ پاننگک کہ ’گڈ ٹوسی یو‘ و کس ءِ پاہو تننگک۔ او پارے کہ قوم پرست آک کراچی ٹی برانز کریر ہچ ءُ انصاف اس رسینگتو‘ ہندا وڑ ایم کیو ایم نا بندغ آتے بے گوا کننگا ولے پدی اتنگتوس‘ وخت اس کہ دافتے مرسڈیز اٹ اتیرہ و گیسٹ ہاؤس اٹ مہمان کیرہ۔ اوپرے کہ ای پاریسٹ کہ اسہ فیک فائنڈنگ کمیشن اس جوڑ کننگے نن کل دانا زموار ان و قربانی تروئی مریک‘۔ پنجا جج‘ پنجا سیاستدان و پنجا جرنیل ءِ کل انا مون آ پاہو تننگے۔ سردار اختر جان مینگل پاے کہ اینو لہجہ غاتیان ہندن لگنگ ءِ کہ نن اپوزیشن اٹی ان‘ انتئے کہ حالیت آک ہندن ءُ۔او پارے کہ ہرافک دا فرینک سٹائن ءِ جوڑ کریرمگہ دا آزموندہ ہندجاٹ آتا ڈاکٹر آتا برخلاف کارروائی کننگا؟ اوپارے کہ دا بندغ آک وردی ٹی ہم مرور‘ شیروانی ٹی ہم مرور وجج آتا دروشم اٹ ہم مریرہ۔

(آن لائن)