ملکی حالیت آک نازرک ءُ،پام کروئی تمک، خواجہ آصف

اسلام آباد: وزیردفاع خواجہ محمد آصف پارینے کہ ملک انا حالیت آک نازرک ءُ دور اسے آن گدرینگ انگ ءُ، مستین نا ردینک آتے دُوارہ کننگپ۔ دوشنبے نادے آ قومی اسمبلی ٹی چکاری نوٹس آ گپ وتران کرسا اوپارے کہ حالیت آتا خواست ءِ کہ مستین نا ردینک آتے دُوارہ کننگپ۔ اوپارے کہ نن دا ایوان نا شان و شرف کن اسٹ مرین، ننے دا ایوان نا شرف ءِ بحال کروئی ءِ۔ داکان بیدس وزیر دفاع خواجہ محمد آصف پارینے کہ وکیل آتا راجی آسودہی و اوفتا ویل آتے اولیتی بنداو تیا ایسر کننگ کن ہروخت کوشست کننگ اُن وکیل آک ننا راج انا اہم ءُ تپہ ءُ، ڈسٹرکٹ بار کنا اُرا و نن دا فیملی نا بشخ اُن، وکیل آتا آسودہی کن کاریم و اوفتا مون تروک ویل آتے ایسر کننگ کنکن شرفمندی نا ہیت اسے۔ داخیال آتا درشانی ءِ او تدوک آ دے تینا ہنکین آ صدر بار مقصود احمد بھٹی و سیکرٹری چوہدری احسن اسماعیل گجرءِ حکومت نا کنڈآن 50 لکھ روپئی نا چیک اس تننگ نا وخت آ گپ وتران کرسا کرے۔ خواجہ محمد آصف پارے کہ وکیل آتا فرضءِ کانود نا پاسداری و رکھ ءِ کیر، وکیل آک انصاف نا علمبردار ءُ، ای 1971 اٹی دا بار انا ممبر جوڑ مسٹ، ڈسٹرکٹ بار انا ویل آتے اولیتی بنداوتیا ایسر کننگ نا کوشست کینہ۔ صدر بار مقصود احمد بھٹی و سیکرٹری چوہدری احسن اسماعیل گجر حکومت نا کنڈآن 50 لکھ روپئی چیک ملنگ آ خواجہ محمد آصف نا منت واری ءِ ہرفے۔ داوخت آ صدر بار مقصود احمد بھٹی، سیکرٹری چوہدری احسن اسماعیل گجرئسک وزیر دفاع خواجہ محمد آصف تون ایف آئی اے کورٹ، انسداد دہشت گردی کورٹ و بینکنگ کورٹ انا خواست کریر ہراڑا او سیالکوٹ اٹی زوت داکورٹ آتا جوڑ کننگ نا باوری کرفے۔ 

(اے پی پی)