صوفی رنگ (بابا فرید)

(صوفی رنگ پنی آ دا بشخ اٹی پنی آ صوفی بزرگ شاعر آتا کلام نا براہوئی منظوم ترجمہ غاتے پیش کننگک۔ تاکہ خوانوک آک اوفتا فکر انا بڑزی و کلہو آن واخب مریر: پروفیسر حسین بخش ساجد)

حضرت بابا فریدؒ پنجابی و سرائیکی نا پنی آ صوفی شاعر و کرامت تخوک آ درویش و ولی نا حیثیت اٹ تینا بھلو چاہنداری اس تخک۔ بابا فریدؒ ضلع ملتان اٹی ودی مس۔ 1173ء و 1271 نا نیام اٹی کم و وَد نود سال زند کرے۔ بابا فریدؒ تصوف نا علم انا رد اٹ بھاز آ کتاب آتے نوشتہ کرینے، کہ اوفتیٹی ”فوائد السالکین“، ”اسرار الاولیاء“، و فارسی و پنجابی ٹی اشلوک اوار ءُ۔ اونا پنجابی کلام اشلوک نا دروشم اٹی ءِ۔ بابا فریدؒ عربی، فارسی، پنجابی و سرائیکی ٹی صوفیانہ شاعری کرینے، اونا شاعری نا سرحال آتیٹی توحید، عشق الٰہی، فنا و بقا، خوفِ خدا، عبادتِ الٰہی، انسان دوستی و گچین آ سیرت اوار ءُ۔ بابا فرید نا کلام 800 سال متکن ءِ۔

کلام خواجہ فریدؒ

کیوہ ہردم استغفار

بشخہ کنے نی رب غفار

کل ءِ بدی و گندہی تیان

توبہ کیوہ لکھ لکھ وار

بھاز گناہ غان پر اریٹ

بشخوک آ اُس رب ستار

پیر و پیغمبرک نا دوست آک ءُ

نی اُس مالک نی مختار

بد عمل اُٹ، نی کر رحمت

کر نی کشتی ءِ ایپار

بیوس اُٹ ای افک وس

بد صورت ای بدکڑدار

رب ارے نا شان عظیم

عیب کنے ٹی لکھ و ہزار

کیوہ گناہ تے یاد گہس

ہوغوہ ہردم زور و زار

صبر انا نن و دے محشر نا

بچفوک آ اُس نی غفار

ای مسکین آ فریدؔ اریٹ نا

نے ای ہردم کیوہ توار

ہفتئی تلار 

تاک: 38

03-09 Oct, 2020

پنہ: 06