زندان نا ڈائری، سال 1973ء (11)

ڈسٹرکٹ جیل نا اسیر آک:.

بیست و یکمیکو دے نیپ انا سنگت ایڈووکیٹ سپریم کورٹ خواجہ امتیاز حسین حنفی عدالت آن سعید ساجدی و حشمت قمبرانی نا ضمانت ءِ منظور کرفے، ولے اسلم کرد انا ضمانت منسوخ کننگا۔ سعید ساجدی و حشمت قمبرانی بجلی روڈ پولیس اسٹیشن آن یلہ کننگار۔ اسلم کرد ءِ داکان جیل آ جوڈیشل کننگا۔ 

سیکرٹری مجید بلوچ (ساجدی) ہم کوئٹہ غا بس، و بلوچ اسٹوڈنٹس آرگنائزیشن نا ریلی تا کماشی ءِ کرے۔ دا ریلی و بی ایس او نا جلسہ غاتیٹی مجید بلوچ نا ایلم سعید ساجدی بی ایس او نا ترانہ ”ماچُک ءِ بلوچانی“ ءِ گٹ اٹ خلککہ و بنوک آتا جوش ءِ ودفیکہ۔ 

آغا وہاب شاہ دلسوز:۔ 

مارچ 1973ء انا ارٹمیکو ہفتہ نا دیک ئسر، نیپ حکومت نا اینک مننگ، میر شیر محمد مری نا دزگیری و حکومتی بیانک جوزہ ئی ءُ چاگڑد اس ودی کریسر۔ الس خار اٹی ئس۔ اسہ دے اس مست بلوچ ورنا نا باسک آک تینا تنظیمی واکداری نا درشانی ءِ کننگ کن منان چوک آ اسہ جلسہ اسے نا پڑو ءِ لاؤڈ اسپیکر آتیٹی کریرہ۔

پیشیم نا وخت ئس منان چوک آ بلوچ ورنا نا اسٹیج ٹہیفنگا۔ بلوچ ورنا نا مخ تف آک اسٹیج نا داپار ایپار آن تولوک ئسر۔ اسٹیج آ بلوچ ورنا نا سروک قطب خان لہڑی، سلیم اکبر بگٹی، فاروق کرد و ایلو راہشونک تولوک ئسرہ۔ جلسہ ٹی بلوچ ورنا نا بینر و بیرک آتا بھلو کچ اس ئس۔ بلوچ ورنا نا باسک آک ساڑی ئسر ہرا حکومت نا مخ تفی ٹی نعرہ خلکرہ، جلسہ بنا کرے، بلوچ اسٹوڈنٹس آرگنائزیشن نا باسک آتتون اوار نیشنل عوامی پارٹی نا مخ تف آک ایب کیب اٹ مہالو آن ہیلہ اس جوڑ مننگ نا تاک اٹ سلوک ئسر۔ جلسہ نا بنا مننگ تون اناگت چوک انا اسہ کنج اسے آن آغا وہاب شاہ دلسوز خان قلات زندہ باد نا نعرہ اس خلسا پاش کرے۔ نن ٹولی تا دروشم اٹ جلسہ نا داپار ایپار آن ساڑی ئسن۔ دا وخت آ ننا کماشی ءِ محمد عمر مینگل کریکہ۔ وہاب شاہ دلسوز نا نعرہ نا لگنگ تون چارما کنڈ آن تالان بی ایس او و نیپ انا باسک آک نعرہ خلنگ نا بناءِ کریر۔ الس وہاب شاہ دلسوز ءِ کوپہ غاتیا ہرفے۔ بی ایس او نا باسک آک محمد عمر مینگل ءِ کوپہ غاتیا ہرفیر و گٹ انا پر آ نعرہ خلسا جلسہ نا داپار ایپار پیری کننگ ءِ بنا کریر۔ ہندا وخت آ نیپ انا اسہ متکن ءُ ورکر اس، ملنگ لانگو علی احمد کرد ءِ کوپہ غاتیا ہرفے مونی گام کننگ آ خننگا۔ جلسہ ٹی ہڑدڑ اس تالان مسوسس۔ جلسہ نا بنوک آک دانگ اینگ نرنگ ءِ شروع کریر۔ حالیت آتے ہُرسا بلوچ ورنا نا غٹ راہشونک دانگ اینگ مسر۔ اسلم کرد مائیک ءِ ہرفنگ تون علی احمد کرد ءِ تران نا سلہ خلک۔ بلوچ ورنا نا جلسہ داسہ ننا جلسہ ٹی بدل مسوسس۔ بلوچ ورنا نا بنوک و سرکڑدہ غاتا جاگہ غا ننا بنوک و سرکڑدہ غاک بسوسر۔ علی احمد کرد نا تران آن پد آغا عبدالوہاب شاہ دلسوز خان قلات نا نعرہ تون اوار اسٹیج آ بس و تران نا بناءِ کرے۔ آغا عبدالوہاب دلسوز نا تران برجا ئس پولیس نا آنسو گیس و لٹ آتیان شپ سپاہیک پولیس افسر آتا کنڈ آن پرمان رسینگ تون ننے آ ہلہلہ اس شاغار۔ اول منہ آنسو گیس انا شیل اس خسار، ولدا ننے آ لٹکاری نا بناءِ کریر۔ داسہ ننا صف آتیٹی ہم ہڑدڑ اس ودی مس، نن چارچوک آتیا ناؤچہ کرسا پولیس آ ڈوکاری نا بناءِ کرین، و پولیس ننے تارتار کننگ کن شیل خسسا ہنا۔ و ننا ورکر آک خڑینک خلسا کریر۔ پولیس تون ننا کش و بگیر ہُرے اسکان برجا سلیس۔ آغا وہاب دلسوز دا ہڑدڑ اٹی پولیس نا دو آ تما، ننا ایلو راہشون تے نیپ انا کارندہ غاک گھیڑ کرسا پولیس نا دُو تیان بچفیر۔ آغا وہاب شاہ دلسوز پنجا سال انا اسہ جوزہ ئی ءُ بندغ اس ئس، و قوم پرست اسے نا وڑ اٹ درست کننگاکہ۔ ریاست قلات نا بحالی نا مخ تف اس ئس، خان آف قلات اوڑا بھاز دوست ئس، مچٹ اس لکھنگ خواننگ نا کاریم ءِ ہم کریکہ۔ دفتر نا خط و کتابت آن جوان واخب ئس۔ اوکان پد خان آف قلات میر احمد یار خان گورنر بلوچستان پن مس تو آغا عبدالوہاب شاہ دلسوز ءِ تینا سلاہکار جوڑ کرے۔

ہفتئی تلار 

تاک: 38

03-09 Oct, 2020

پنہ: 03