بپر جوائے طوفان، بجلی ءِ بند کننگ نا حوال گمان آن پیشن اف، خرم دستگیر

اسلام آباد: بنجائی وزیر توانائی انجینئر خرم دستگیر خان پارینے کہ سمندری طوفان آن ودی مروک آ حالیت آتون مون تننگ کن پورو وڑاٹ تیار اُن، ایل این جی نا سپلائی ٹی خلل بسنے، پاور پلانٹ آتے گیس انا فراوانی نا گیگ بدل بست وبند کننگانے، بجلی نا بحالی کن ایلو کمپنی تیان ہم ٹیم حیسکو نا علاقہ غاتیا گدریفنگ انگ ءِ، ننا کوشست ءِ کہ باسنی ٹی لوڈشیڈنگ کم آن کم مرے۔ داخیال آتا درشانی ءِ او چارشنبے نادے آ داڑے پریس کانفرنس آن تران کرسا کرے۔ اوپاریکہ سمندری طوفان بپرجوائے آن داسکان بجلی نا فراوانی ٹی ہچ ءُ اڑاند اس بتنے، ٹھٹھہ بدین و ایلو علاقہ غاتیٹی ترند تہو تا چرجوئی ءِ اگہ فلائٹ ملا تو اینو شام آ ای تینٹ سندھ آ روانہ مریوہ۔ خرم دستگیرپارے کہ سیکرٹری پاور ڈویژن تون ایلو مسہ سینئر آفیسر آتے سندھ آ گدریفنگ انگ ءِ، طوفان آن زہمی علاقہ حیسکو نا علاقہ ٹی ءِ، طوفان تون مون تننگ کن ایلو کمپنی تیان ٹیم گدریفنگ انگ ءِ۔ اوپارے کہ لاہور، گوجرانوالہ، فیصل آباد، ملتان، و سکھر آن ٹیمک سرمریرہ، 2 ہزار بندغ آتیا تالان بجلی نظام اٹی گچینی کن کارندہ مون تننگ اُن، 2 ہزار کارندہ غاتا گدریفنگ اسہ قومی ءُ کوشست اسے۔ نوکاپ اٹی ہم پاور ڈویژن جوان ءُ کاریم کریسس۔ اوپارے کہ داسکان اندازہ اف کہ دا طوفان نا اثرآک انت مریرہ، طوفان آن ودی مروک آ حالیت آتون مون تننگ کن نن پورو وڑاٹ تیار اُن، داسکان طوفان آن ایل این جی نا سپلائی ٹی اڑاند بسنے، ایل این جی سپلائی ٹی اڑاند آن پاور پلانٹ آتے گیس فراوانی سلیسنے، گیس انا سپلائی کن گیگ بدل نا بست وبند ہم کننگا، کے الیکٹرک ءِ گیس انا فراوانی کن بست وبند کرینے، گیس سپلائی ٹی اڑاند آن بجلی نا لوڈشیڈنگ اٹی اسہ گھنٹہ نا ودکی مریک۔ داکان بیدس وزارت توانائی نا ترجمان پارینے کہ سمندری طوفان بپر جوائے آن ملک اٹی آرایل این جی نا فراوانی ٹی اڑاند ودی مسنے، آرایل این جی آن بجلی نا پیدواراٹی عارضی کمتی و لوڈشیڈنگ اٹی عارضی ودکی مسنے۔ چارشنبے نادے آ تینا ٹویٹ اٹی ترجمان پارے کہ سمندری طوفان نا وخت آ اوکان پد اٹی بجلی نا بحالی ٹی حیدرآبا د الیکٹرک سپلائی کمپنی (کیسکو) نا کمک کن گیپکو، لیسکو، فیسکو، میپکو و سیپکو 5 بشخوک آ کمپنی تا ٹیم تے گدریفنگ انگ ءِ و داکرکی علاقہ غاتیٹی تینا زمواری تے پورو کیرہ۔ اوپاریکہ سمندری طوفان بپرجوائے آن پاکستان اٹی آرایل این جی نا فراوانی ٹی اڑاند ودی مسنے ہراڑان آرایل این جی آن بجلی نا پیدوار اٹی عارضی کمتی ولوڈشیڈنگ اٹی عارضی ودکی مسنے۔ ترجمان پارے کہ نن کراچی نا شاری تے معمول نا فراوانی ءِ برقرار تخنگ کن کراچی الیکٹرک ءِ ایندھن نا پورو فراوانی ءِ پک کننگ اُن۔

(اے پی پی)