ملخ آتے توننگتو تو بلوچستان اٹ ڈکال وڑ ءُ حالیت اس مریک

کوئٹہ : پاکستان تحریک انصاف بلوچستان نا پارلیمانی لیڈر وزیر تعلیم سردار یار محمد رند پارینے کہ بنجائی و صوبائی حکومت ملخ آتے کنٹرول کتوس تو بروک آ شش تُو اٹی ڈکال کون ءُ حالیت اسے نا سوب آن بلوچستان نا مخلوق بینگنی آن کہیک۔ ہرا یخین اٹ سگ آن پیشن ءُ گڑاس مرو۔ حکومت بجٹ اٹی کشارگر آتے کن خصوصی پیکیج اس جتا کے، چناک ننے تینا ساہ غان ہم زیات دوست ءُ۔ و اسکول آتے ملپنہ۔ خلاف ورزی کروک آتا لیسن آتے منسوخ کرسا کانودی کارروائی کننگک۔ پرائیویٹ اسکول آک دھڑکو تننگ نا جاگہ غا سلاہ ایتر، قوم آتا آخبت تعلیم آن بیدس جوڑ مننگ کپک۔ دا ہیت آتا درشانی ءِ سردار یار محمد رند خبر ایجنسی تون ہیت و گپ کرسا کرے۔ او پارے کہ ملخ آتا چٹفنگ کن بلوچستان حکومت ءِ سلاہ تسنن، کورونا وائرس نا سنگین حالیت نا سوب آن ملخ آتا چٹفنگ کن ایکشن پلان جوڑ کننگتو، حکومت بایدے ملخ آتا خواہے بٹوک آ جاگہ غاتیا اسپرے کروسس و اوفتے چٹفوسس، تو دا وَڑ حالیت آک ول ویچڑ متوسہ۔ او پارے کہ وزیراعلیٰ بلوچستان جام کمال آن خواست ءِ کہ دا کنڈ آ چکار کے۔ انتئے کہ ملخ آتے اگہ کنٹرول کننگتو و بروک آ شش تُو اٹی بنجا نا کنڈ آن ہچ ءُ کمک اس رسینگتو تو بلوچستان اٹی جائی ڈکال بریک۔ ہراڑان بلوچستان نا مخلوق لنگڑی آن کہیک۔ بلوچستان نا کشارگر تے بھلو کچ اسے ٹی نسخان مسنے، ڈکال آن گیشتری کشارگرک مہالو آن امپسا بلوچستان آن ہنانو۔ حکومت بلوچستان بروک آ بجٹ اٹی کشارگر تے خصوصی پیکیج اسے نا پڑو ءِ کے، اگہ کننگتو تو اوفتا زند عذاب مریک۔ تعیلم و جانجوڑی ءِ بایدے اولیت تننگے، دن تو چنا تا شش تُو زیان مسنو، ولے دا گڑا اوفتا زند ءِ بچفنگ کن ءِ، و اگہ اوفک زندہ سلیسر تو انشاءاللہ دا کمتی ءِ بروک آ سال ہم پورو کننگ مریک۔ او پارے کہ منہ پرائیویٹ اسکول اس اریر، اوفتیان خواست ءِ کہ نم ہرا مہذب و عظیم انگا کسب تون تعلقدار اریرے، تو نمے بایدے تعلیم نا زیات درک مرے، گیشتری پرائیویٹ اسکول آک اخبار تیٹی بیان ایترہ کہ اسکول آتے ملنہ، ننا چناک ننے آ دوست ءُ، دن مننگ کپک کہ نم اسکول آتے ملرے و نن تولن ہُرن، اسکول آک ملنگپسہ، و ہرکس خلاف ورزی کرے اونا لیسن ءِ منسوخ کرسا اوفتا برخلاف کارروائی کینہ۔ پرائیویٹ اسکول آک دھڑکو تفس، بلکن بریر ننے سلاہ ایتر، کہ دا گڑا ءِ امر مون آ دننگ کینہ۔ او پارے کہ اینو ای وزیراعلیٰ بلوچستان ءِ سمری اس راہی کرینٹ، بلوچستان نا 27میونسپل کمیٹی ءُ، اوڑے نن ڈغار ہلنگ خوانہ، بجلی،گیس اتون اوار سافٹ لون ہم ایتنہ و اوڑے پوسکن ءُ اسکول، تعلیمی ادارہ ملنگ خوانہ۔

(آن لائن)