وزیراعلیٰ بلوچستان و اپوزیشن نا نیام اٹ مذاکرات اینو ولدا مریک

کوئٹہ : وزیراعلیٰ بلوچستان و اپوزیشن نا نیام اٹ مذاکرات نا ارٹمیکو دور اینو دو شنبے نا دے مریک۔ حوال آتا رد اٹ وزیراعلیٰ بلوچستان جام کمال و بلوچستان اپوزیشن نا مسہ باسکی کمیٹی ہرانا کماشی ءِ اپوزیشن لیڈر ملک سکندر ایڈووکیٹ کیک، وخت اس کہ نصر اللہ زیرے و ملک نصیر احمد شاہوانی دانا باسک ءُ۔ مذاکرات نا ارٹمیکو دور اینو مریک۔ مذاکرات اینو پنچ بجہ غا بنا کیک۔ یات سلے کہ جمعہ نا دے وزیراعلیٰ بلوچستان جام کمال و اپوزیشن نا ماسہ باسکی کمیٹی نا نیام اٹ اِرا گھنٹہ غان زیات مذاکرات مس۔ ولے ڈیڈ لاک ایسر متو۔ حوال آتا رد اٹ اینو مروک مذاکرات اٹی اپوزیشن نا کنڈ آن پیش کننگوک خواست و سلاہ سوج آتا بابت پک فیصلہ مریک۔ اپوزیشن نا کنڈ آن مذاکرات نا بے سہبی نا رند اٹ اپوزیشن سیوت اٹی اوار جماعت آتا سلاہ سوج اٹ آخبت نا لائحہ عمل اس سجفنگک۔ اپوزیشن نا کنڈ آن حکومت ءِ تننگوک خواست آتیٹی صوبہ نا حکومتی حلقہ غاتیانبار اپوزیشن حلقہ غاتے ہم بریبری نا بنداو آ فنڈ تننگ و حلقہ غاتیٹی گچین مفروک بندغ آتا سٹی نیام تمنگ تون اوار اپوزیشن اسمبلی باسک آتا استحقاق و شرفداری ءِ برجا تخنگ اوار ءِ۔ یات سلے کہ اپوزیشن جماعت آتا کنڈ آن سَے شنبے نا دے اپوزیشن حلقہ غاتیٹی حکومت نا کنڈ آن گچین مفروک بندغ آتے فنڈ تننگ اپوزیشن حلقہ غاتے گوجالنگ و کورونا نا سیبو ءِ ہلسا حکومتی ڈیوالئی نا برخلاف بلوچستان ا سمبلی آن ریلی اس کشنگاسس، و وزیراعلیٰ ہاﺅس نا مون آ برانز کننگاسس۔

(آن لائن)