ساڑی بجٹ الس، صنعت و روزگار دشمن ءِ،پیپلز پارٹی

اسلام آباد: پاکستان پیپلز پارٹی نا بنجائی راہشونک پارینو کہ ساڑی بجٹ الس، صنعت، روزگار دشمن ءِ۔ وخت اس کہ دا کورونا وائرس و ملخ ڈَل آتے تالان کننگ نا سوب مروک ءُ بندغ اسے۔ 450ارب روپئی نا پٹرولیم مصنوعات آتیا خراج خلنگانے، ہراڑان غریب روآنراست زہمی مریک۔ فرنٹ لائن آ جنگ تروک آ ڈاکٹر، پیرا میڈیکل اسٹاف کن بجٹ اٹ ہچ اس تخنگتنے۔ این ایف سی ایوارڈ نا خلاف ورزی ءِ کرسا صوبہ غاتا بشخ آن یانزدہ درسَد کٹ خلنگے تو صوبہ غاک امر کورونا وائرس و ملخ آتا مون ءِ توننگ کیرہ۔ ہراتم سندھ حکومت کورونا وائرس نا بابت کاریم نا بناءِ کرے تو وزیر اعظم پاریکہ کہ دا اِ  اسے، ہرا ملک آتیٹی وخت آ ایکشن ہلکر، اوفک کورونا نا مون ءِ توننگ کریر۔ خراج فری بجٹ نا ہیت کرسا حکومت الس تون دروغ تڑنگ اٹی ءِ۔ دا ہیت آتا درشانی ءِ پاکستان پیپلز پارٹی نا بنجائی حوالکاری سیکرٹری ڈاکٹر نفیسہ شاہ، ترجمان چیئرمین بلاول بھٹو زرداری مصطفیٰ نواز کھوکھر، ایم این اے طارق شاہ و سینیٹر روبینہ خالد اسک اسیجا پریس کانفرنس کرسا کریر۔ ڈاکٹر نفیسہ شاہ پارے کہ پاکستان دا وخت آ مج اسے ٹی اختہ ءِ، و تحریک انصاف نا حکومت دین اس جوڑ مرسا الس آ بیٹ ءِ۔ دا وخت آ روایتی بجٹ نا گرج اَلوکہ، ساڑی حالیت آتیٹی السی بجٹ اس پیش کروئی ئسکہ۔ بجٹ بایدے ہندن مروسس کہ الس نا ٹھپ آتے درمان کروسس۔ اگہ نان سلیکٹڈ حکومت اس متوکہ تو الس نا فائدہ نا بجٹ اس بسکہ۔ گڑا بجٹ عوام دشمن، صنعت دشمن، کشارگر دشمن، پوریاگر دشمن ءِ، و بیرہ کورونا و ملخ ڈَل اکن گچین ءِ۔ وزیراعظم کورونا وائرس نا پد اٹ تینے ڈکنگ اٹی ءِ۔ او پاریر کہ دا وخت آ پاکستانی الس و زرگزران زیات باریم نا کیرغ آن ءُ، حکومت دافتے کن ہچ اس کتو، و حکومت زرگزران ءِ سوگو کننگ نا بابت بے سہب مسنے۔ او پاریر کہ حکومت ءِ 1.2کھرب مارچ اپریل و مئی ٹی اُرا ٹی تولوک کورونا آن زہمی مروک الس آ خڑچ کروئی ئس، ہرافتیان 280 ارب روپئی خڑچ کننگا، ایلو پیسہ غاک ہرادو؟

(آن لائن)