منہ دے ٹی کورونا کیس آتا کچ 3 لکھ مننگ نا گمان

اسلام آباد : بنجائی وزیر ڈٹ بندی و نیشنل کمانڈ اینڈ کنٹرول سینٹر (این سی او سی) نا سروک اسد عمر ملک اٹی کورونا وائرس نا بابت پوسکن ءُ گڑتی اسے نا حوال تسنے۔ میڈیا تون ہیت و گپ کرسا اسد عمر پارے کہ رکھی گام گیج کننگاکہ تو کورونا نا مون ءِ توننگ مسکہ۔ ساڑی حالیت اٹی ہچ ءُ بدلی اس کننگتو تو کورونا کیس آتا کچ 3 لکھ اسکان سر مننگ کیک۔ او پارے کہ جون نا اخیر اسکان کورونا نا ناجوڑ آتا کچ مسہ لکھ اسکان رسینگ نا گڑتی ءِ، و ساڑی حالیت برجا سلیس تو جولائی نا اخیر اسکان کورونا کیس آتیٹی ہشت دہ ہنداخس ودکی مننگ کیک، و اگہ دن مس تو ناجوڑ آتا کچ دہ لکھ اسکان رسینگ نا گمان ارے۔ بنجائی وزیر نا پاننگ ئس کہ حکومت شاری تا زند انا رکھ اکن گام گیج کننگ اٹی ءِ، و کورونا نا تالانی ءِ توننگ کن پبی گام گیج کینہ۔ حکومت ضابطہ کار نا خلاف ورزی کننگ آ سخت کارروائی کیک، ہرا علاقہ غاتیٹی کورونا کیس آک زیات مسر، اوڑے سمارٹ لاک ڈاو ¿ن کینہ۔ اسد عمر پارے کہ بنجا جون انا اخیر اسکان 2 ہزار 150 آکسیجن بیڈ ودفک، ہرافتیان سندھ و پنجاب ءِ 5، 5 ہزار، خیبر پختونخوا 4 ہزار، بلوچستان ءِ 2 ہزار و اسلام آباد ءِ 150 تننگک۔ این سی او سی نا سروک پارے کہ 2 دے آن کورونا نا 30 ہزار ٹیسٹ ہڑدے نا کاٹم آ مننگ ءِ، بروک آ منہ دے اٹی کورونا ٹیسٹ انا ہڑدے ئی بود ءِ یک و نیم لکھ اسکان دینہ۔ او پارے کہ کورون ءِ تالان تو مروئی ءِ، ولے اونا ترندی ءِ شیف شاغوئی تمک، تاکہ جانجوڑی نا نظام آ زور بف، اگہ کورونا تالانی توننگتو تو ننا جانجوڑی نا نظام ژند مننگ کیک۔

(آن لائن)