عمران خان نا 60 ارب نا کرپشن ہلنگانے، عطاء تارڑ

اسلام آباد : وزیراعظم نا خصوصی کمکار عطاء تارڑ پارینے کہ عمران خان نا 60ارب نا کرپشن ہلنگا‘ ہرانا منظوری ءِ او بند انگا لفافہ نا کمک اٹ کابینہ غان ہلک۔ عمران خان ناپاننگ آ شرپسند آک جناح ہاؤس، جی ایچ کیو تون اوار الو سرکاری ملکیت آتیا جلہو کریر‘ ڈٹ بندی نا زموار مکری آ چہرہ غاتے دزگیر کرسا انسداد دہشت گردی نا مقدمہ چلیفنہ۔ اسلام آباد اٹ پریس کانفرنس کرسا عطاء تارڑ پارے کہ عمران خان نا کرپشن ہلنگا‘ او ملک و قوم انا 60ارب لٹا و قومی خزانہ ءِ ارب آروپئی تا نسخانی کرے، عمران خان بند انگا لفافہ ٹی کابینہ آن دا دزی نا واردات نا منظوری ءِ ہلک‘ عمران خان و اونا اُرائی القادر ٹرسٹ نا ٹرسٹی ءُ او پراپرٹی ٹائیکون آن 458کنال نا ڈغار ہلکر۔ 18کروڑ روپئی القادر ٹرسٹ نا دنا اکاؤنٹ آن بسر‘ دیر راہی کرے تا؟ القادر نا ٹرسٹ آ دستخط عمران خان و بشریٰ بی بی ناءُ‘ پاننگے کہ القادر ٹرسٹ اٹ ہرا الس نا آسودہی نا کاریم مننگ اٹی ءِ‘ دا دنیا نا تاریخ نا کل آن بھلا کرپشن اسکینڈل ءِ‘ او پارے کہ دنیاٹی اسہ جاگہ اس ہم دن مفک کہ ڈغار مف و ہاؤسنگ سوسائٹی منظور کرفنے‘ ڈوہی بندغ آک دا وڑ انا اسکیم جوڑ کیرہ۔ اوپارے کہ عمران خان سیاسی مخالف آتیا دوبہ غاتے پک کننگ کتو۔ شہزاد اکبر و عمران خان ءِ تینالٹ وپل نا حساب تروئی مریک‘ ہمو پیسہ غاک قوم انا ئسر‘ ہرا برطانیہ غان پاکستان آ راہی کننگار۔ اوپارے کہ عمران خان نا پاننگ آ شرپسند آک جناح ہاؤس، جی ایچ کیو و سرکاری ملکیت آتیا جلہو کریر و اوفتے نسخان رسیفیر‘ دا ڈٹ بندی نازموار کل ءِ دزگیر کرسا اوفتا برخلاف انسداد دہشتگردی نا مقدمہ چلیفنگک۔

(آن لائن)