
پی ڈی ایم نا اسلام آباد اٹی برانزی دھرنا اینو مریک
مولانا فضل الرحمان نا کنڈ آن ڈی چوک آ برانز کننگ نا بنجائی وزیر تا درخواست مسترد، نن پڑو کرینن، الس پیش تمک، داسہ فیصلہ الس نا عدالت اٹی ءِ، پین جاگہ غا برانز کننگ نا سوچنگ ہم کپنہ، پی ڈی ایم سروک
اسلام آباد : پی ڈی ایم نا اسلام آباد اٹی برانزی دھرنا اینو مریک۔ پی ڈی ایم نا سروک مولانا فضل الرحمان سپریم کورٹ نا جاگہ غا ڈی چوک آ برانز کننگ نا بنجائی وزیر تا خواست ءِ مسترد کرسا پارینے کہ نن پڑوکرینن الس پیشن تمانے و فیصلہ داسہ الس نا عدالت اٹ مریک‘ مچ آ ملک آن قافلہ غاک اسلام آباد کن راہی مسنو۔ کارندہ غان پرامن ءُ و برانز ہم پرامن مریک۔ حوال نا رد ات پی ڈی ایم ناکنڈآن سپریم کورٹ ناپیشن برانز نا باندات آ بنجائی وزیر خزانہ اسحاق ڈار، وزیر داخلہ رانا ثناء اللہ اسک پی ڈی ایم نا سروک مولانا فضل الرحمان تون اوڑدہی کریر‘ بنجائی وزیرک مولانا فضل الرحمان آن سپریم کورٹ ناپیشن آ برانز کپننگ نا خواست کریر‘ اسحاق ڈار پارے کہ منہ دے مست ہم ملک اٹ حالیت آک خراب مسر‘ بنجائی حکومت خواہک کہ پی ڈی ایم ڈی چوک آ برانز کے ولے مولانا فضل الرحمان اسحاق ڈار و رانا ثناء اللہ نا خواست ءِ مسترد کرے و پارے کہ نن پڑو کرنن‘ داسہ فیصلہ الس نا عدلت اٹ مریک۔ مولانا فضل الرحمان پارے کہ مچ آ ملک آن قافلہ غاک اسلام آباد بننگ اٹی ءُ‘ کارندہ غاک پرامن و پرامن برانز کیرہ‘ ننا کارندہ غاک اسہ گملہ ونہال اس ہم پرغپسہ‘ نن پرامن ءُ بندغ ان‘ او پارے کہ الس پیش تمک و فیصلہ ہم الس نا عدالت اٹ مریک۔ پی ڈی ایم نا کنڈآن سپریم کورٹ نا چیف جسٹس نا برخلاف برانزی دھرنا اینو مریک۔ مردان آن ضلعی امیر مولانا محمد قاسم ناکماشی ٹی قافلہ سہب انا ہشت بجہ غا ضلعی دفتر جامعہ ربانیہ غان راہی مریک‘ دابابت اسہ دیوان اس ضلعی امیر مولانا محمد قاسم ناکماشی ٹی اڈہلک ہراٹی ضلعی ناظم عمومی مولانا امانت شاہ حقانی، مسکوہی صوبائی وزیر حافظ اختر علی، ضلعی سیکرٹری حوالکاری مولانا قیصر الدین، تحصیل تخت بھائی نا میئر حافظ محمد سعید،کاٹلنگ نا میئر مفتی حماداللہ، رستم نا میئر مولانا مبارک احمد، تحصیل مردان نا امیر مولانا محمد عاقل انصاری، ملک احد وایلوفک تران کریر۔ مولانا محمد قاسم پارے کہ اسہ بندغ اس ملکی ادارہ غاتا شرف ءِ مِش تا کرینے وخت اس کہ سپریم کورٹ نا چیف جسٹس اودے کلیئر کرینے او پارے کہ عمران خان اسہ ایجنڈا سے نا رد اٹ پاک فوج ءِ بدنام کننگ نا کوشست کننگ اٹی ءِ و سپریم کورٹ نا چیف جسٹس ہم اوڑتون تفوک ءِ۔ملکی ادارہ غاتا شرف ءِ عمران خان واونا کمکار آک ہرا نسخان ءِ رسیفینو اونا درور رسینگپک۔ او پارے کہ سپریم کورٹ نا مون آ پاکستان ڈیموکریٹک مومنٹ ناکنڈآن اینو دھرنا تننگک و برانز کننگ کن ضلع مردان آن جمعیت علماء اسلام نا قافلہ ضلعی امیر مولانا محمد قاسم ناکماشی ٹی سہب انا ہشت بجہ غا راہی مریک۔ پشاور وایلو ضلع غاتا قافلہ غاک رشکئی انٹر چینج نا ہند آ اسیجا مریرہ وخت اس کہ مالاکنڈ ڈویژن نا قافلہ غاک کرنل شیر انٹر چینج و سویلی ضلع غاتا قافلہ غاک ہکلہ انٹر چینج آ اسیجا مرسا صوبائی امیر سینیٹر مولانا عطاء الرحمان نا کماشی ٹی اسلام آباد آ سرمریرہ۔
(آن لائن)