پاکستان اٹی جمہوریت شیف، عدلیہ اسٹ انگا اومیت ءِ، عمران خان

لاہور : چیئرمین پاکستان تحریک انصاف عمران خان پارینے کہ پاکستان اٹ جمہوریت ’شیف انگا کہول آٹے و عدالت اسٹ انگااومیت ءِ‘ یہ پیدوار ءِ کہ کنے برمتہ کننگ نا پرمان ءِ آرمی چیف تسوسس۔ ای ذہنی وڑ اٹ دوارہ جیل آ ہننگ کن تیار اٹ‘ ای مدام ہر وڑ انا بے چیٹی نا مخالفت ءِ کرینٹ‘ کنے اسٹیبلشمنٹ اقتدار اٹ اتتویسس‘ کل سروے تا رد اٹ کنا جماعت پاکستان ناکل آن پنی و بھلا جماعت ئس‘ فرق بیرہ دا ئس کہ آرمی کنا مخالفت ءِ کتو‘ حکومت خلنگ اٹی ءِ انتئے کہ او گچین کاری تے ٹی با ایترہ۔ او کنے و جماعت ءِ گچین کاری تیان پیشن کننگ کن ڈٹ بندی کرینو‘ داسہ ای الس نا عدالت اٹ کاوہ‘ چار شنبے آن السی رابطہ مہم نا بناءِ کیوہ۔ اومیت ارے کہ عدالت مسہ ہفتہ ٹی گچین کاری تا تاریخ اس ایتک۔ درملکی ٹی وی ءِ تروک انٹرویو ٹی عمران خان پارے کہ دزگیری نا وخت آ ای کمانڈو آنبار خننگوک لٹ دوٹی بندغ آتے اناگت جلہو کننگ آ خناٹ ای خیال دا بندغ آک سپریم کورٹ نا پاننگ آ کنے رکھ تننگ کن بسنو انتئے کہ کنا جان ءِ خطرہ ءِ‘ ولے ہمو بندغ آک ہندن جلہو کریر کس پاہے ہموڑے دہشت گرد اس مرے‘ ولدا کنے سما تما کہ دا بندغ آک کنے دزگیر کننگ کن بسنو‘ا وپارے کہ ای داڑا بھاز حیران مسٹ انتئے کہ دا بندغ آک کنے آ بھاز بیداد کرے و کنے دہشتگرد آتیانبار دزگیر کریر در۔ کنے ہموڑے ہچ ءُ معلومداری اس الو ہندا سوب آن کنے سما الو کہ پیشن انت مننگ اٹی ءِ‘ او کنے برمتہ کریسر‘ برمتہ کننگ نا اصطلاح ءِ کاریم اٹ اتنگ نا سوج انا ورندی ٹی عمران خان پایر کہ کنے آرمی برمتہ کرے و آرمی چیف نا منشا غان بیدس ہچ مف‘ آرمی ہنداوڑ انا کاریم کیک‘ دا پیدوار ءِ کہ کنے برمتہ کننگ ناپرمان ءِ آرمی چیف کریسس۔ سکیورٹی گڑتی تا سوب آن رکھ تننگ کن دزگیر کننگ نا حکومتی موقف آ تبصرہ کرسا عمران خان پارے کہ دا بھلو بے قوفی اسے‘ داکان مست او کنا اُراغا جلہو کرینو‘ او خواہسرہ کہ ای مجسٹریٹ اسلام آباد نا عدالت اٹ پیش مرے ہرانا ای مہالو آن باور کرفیسٹ‘ ہندا سوب آن کانود نا رد اٹ او دا باور کرفنگ آن پد کنے دزگیر کننگ کتوسہ‘ ای ضمانتی بانڈ ہم تسٹ ولے او اوفتے امنا کننگ آن نمن مسر و کنا اُراغا جلہو کریر‘ او پارے کہ سیوتی حکومت گچین کاری تیان خلنگ اٹی ءِ‘ اوفتے گچین کاری تے ٹی کنا پارٹی نا دو آن با تننگ نا خلیس ارے‘ ہندا سوب آن او فیصلہ کرینو کہ اگی جیل اٹ مریر یا خلنگتو تو گڑا او گچین کاری تا موکل ایترہ‘ کنا پارٹی نا گیشتری سرکڑدہ غاتے دزگیر کننگانے۔ دوارہ دزگیر کننگ نا گمان نابابت سوج انا ورندی ٹی عمران خان پارے کہ ای ذہنی وڑ اٹ دوارہ جیل آ ہننگ کن تیار اٹ‘ ای اسلام آباد آ ہننگ آن مست ہم ہندا پارٹ‘ الے اصل مدعا دادے کہ او کانود ناخلاف ورزی آ آخا بلکہ گچین کاری تا گو آن پیشن کشنگ کن دزگیر کننگ خوارہ‘ حکومت گچین کاری تے ٹی با تننگ آن خلنگ اٹی ءِ‘ او ڈٹ بندی کرینو کہ کنے و کنا جماعت ءِ گچین کاری تیان پیشن کشنگے۔

(آن لائن)