آئین جوڑ کننگ نا واکداری بیرہ پارلیمنٹ تون ءِ، بلاول بھٹو

اسلام آباد : وزیر خارجہ بلاول بھٹو زرداری پارینے کہ آئین جوڑ کننگ نا واکداری بیرہ پارلیمنٹ تون ءِ پاریمنٹ سپریم ءِ‘ کل ءِ دانا مون آ کاٹم ءِ شیف کروئی مریک تینا بیان اٹ وزیر خارجہ پارے کہ 14 مئی پاکستان و جمہوریت کن تاریخی ءُ دے اسے‘ دا دے آ الس نا پنی آ سیاسی قائد گودی بینظیر بھٹو شہید و پاکستان مسلم لیگ نا قائد میاں نواز شریف میثاق جمہوریت نا دستاویز آتیا دستخط کریسر۔ میثاق جمہوریت آ سوگو سلنگ وعمل کننگ آن ملک انا وقار ودک و جمہوریت سوگو مریک۔ صدر آصف علی زرداری میثاق جمہوریت آ عمل کرسا 18 می آئینی ترمیم نا کمک اٹ صدر ءِ دوئی کل واکداری تے پارلیمان نا دوٹی تسوسس۔18 می آئینی ترمیم بنجا و کل اکائی تا نیام اٹ اسہ میثاق اسیے اینو پارلیمان آ جلہو مننگ اٹی ءِ و اونا واکداری تے چیلنج کننگ انگ ءِ‘ یا گڑا آئین ءِ نوشتہ کننگ انگ ءِ ہرادے پاکستان پیپلزپارٹی ہچ گہس امنا کپک‘ اوپارے کہ آئین جوڑ کننگ نا واکداری بیرہ پارلیمنٹ تون ءِ‘ ریاست نا ایلو کل ادارہ غاتا فرض ءِ کہا و پارلیمان نا منظور کروک کانود آ عمل کیر‘ او پارے کہ اینو دا ہیت انا گرج ءِ کہ میثاق جمہوریت نا ہرا ٹک آتیا عمل متنے ہمو ٹک آتیا عمل کننگے۔ گودی بینظیر بھٹو شہید و پاکستان پیپلزپارٹی نا کارندہ غاتا بھلا قربانی تا سوب آن 1973 نا آئین اصل دروشم اٹ بحال مس ہرا جمہوریت آن خار کنوک آتا شکست ئس۔ ملک انا سلامتی و جمہوریت نا بحالی نا عظیم آ جہد انا سوب آن گڑھی خدا بخش بھٹو نا قبرستان شہید آتیان آباد مس ہراکان شہید آتا دتر نا خیسنی تون جمہوریت نا دے ٹک ایتک۔ بلاول بھٹو زرداری پارے کہ است بڈی نا ہیت دادے کہ اینو پارلیمنٹ ناباسک و جمہوریت پسند سیاسی پارٹیک پارلیمنٹ نا واکداری نا اصول آتیا اسہ ٹک آٹو۔میثاق جمہوریت آ سختی و پک عمل کننگ آن غیر جمہوری سوچ ءِ شکست تروئی مریک۔ اوپارے کہ پارلیمنٹ سپریم ءِ و کل ءِ اونا مون آ کاٹم ءِ شیف کروئی مریک۔

(آن لائن)