جی ایچ کیو جلہو، 26شرپسند درست کننگار، فوٹوک تا پاش

راولپنڈی : سی سی پی او راولپنڈی سید خالد محمود ہمدانی جی ایچ کیوگیٹ آ جلہو کروک 26 شر پسند آتا فوٹے تے میڈیا ءِ نشان تس۔ یک شنبے نادے پریس کانفرنس آن تران کرسا سی پی اوسید خالد محمود ہمدانی پارے کہ راولپنڈی پولیس دا وخت اسکان 17مقدمہ ٹی 264 بندغ ءِ دزگیر کرینے‘ وخت اس کہ مقدمہ نمبر 708 تھانہ آراے بازار (جی ایچ کیو کیس) اٹ کل دزگیر شرپسند آتا کچ 76 مسنے‘ او پارے کہ تدوک آدے دزگیر مروک شرپسند آتے ٹی احسان، عبداللہ، ادریس، وقاص، ایاز، قمر الزمان، عمر، علی حسین، فرہاد اللہ، عصمت، ابوبکر، قمر زمان، سجاد منیر، نبیل، صداقت، نعمان، عامر شاہد، فرہاد، شہریار، لعل شاہ، اکمل، عدیل، پیرزادہ شہباز، ارشد، منور و سید قمر اوار ءُ۔ سی پی او راولپنڈی خالد ہمدانی پارے کہ ویڈیوتا کمک اٹ پدرند ءِ خلسا اوفتے دزگیر کننگ انگ ءِ‘ ویڈیو ٹی پٹرول چٹ تننگ آ خننگوک بندغ ءِ ہم دزگیر کننگانے وخت اس کہ بندغ آتے جی ایچ کیو گیٹ انا کنڈآ دَروک آ بندغ ءِ ہم دزگیر کننگانے‘ گیٹ ءِ پرغوک آتے ہم دزگیر کننگانے۔ پولیس افسر پارے کہ ہڑدڑ نا وخت آ شاہراک ملوک ئسر و اہم انگا ملکیت آتا سکیورٹی ہم رکھوک ئس۔ او پارے کہ میٹرو بس انا 80 کروڑ روپئی نا نسخان مسنے۔ 20 انا کچ پولیس گاڈی تے نسخان رسیفنگا‘ بیدادی نا کارروائی تے ٹی ایس ڈی پی او وارث خان و ایس ایچ او رتہ امرال تون اوار 29 بندغ ٹھپی مسر‘ او پارے کہ راولپنڈی ٹی انٹیلیجنس نا کمتی اف‘او پبی کمک کریر ہرانا سوب آن راولپنڈی ٹی حالیت آک بھاز خراب متوس‘ نسخان تا حساب ءِ حکومت خلنگ اٹی ءِ‘ ہر کس دا ڈوہ تا زموار ءِ اوفتیان پرسجو کننگک۔ سی پی او پارے کہ ایس ایس پی انوسٹی گیشن زنیرہ اظفر ناکماشی ٹی خصوصی کمیٹی حساس ادارہ غاتا بابت مقدمہ غاتا جاست پاست ءِ کننگ اٹی ءِ وخت اس کہ مست آن جیل آ راہی کروک 90نا کچ دوبہ دار آتے ہم شاہدی نا بنداو آ دا مقدمہ غاتے ٹی کانود نا رد اٹ بٹنگ انگ ءِ۔ سی سی پی او راولپنڈی پارے کہ شرپسند آتا کماشی ءِ کروک آتے دزگیر کننگ کن ہم چھاپہ خلنگ انگ ءِ۔ شرپسند دوبہ دار آتے سخت سزا ترفنگ کن کل کانودی خواست آتے پورو کننگک۔

(آن لائن)