کنوئی گڑاتا بے سلوک فراوانی ءِ پک کننگے، وزیر اعظم

اسلام آباد : وزیراعظم محمد شہباز شریف پارینے کہ الس ءِ بنداوی المی آ گڑاتا بے سلنگ آن و کم نہاد اٹی فراوانی بنجائی و صوبائی حکومت آتا اولی زمواری ءِ، ملک اٹی خولم تون اوار ایلو بنداوی کنوئی آ گڑاتا ہچ ءُ کاختی اس اف، بنداوی گڑاتا درآمد اٹی بروک آ اڑاند آتے اولیتی بنداو آ مُر کننگے۔ داخیال آتا درشانی ءِ وزیراعظم تینا کماشی ٹی بنداوی کنوئی آ گڑاتا دستیابی و پرائس کنٹرول نا بابت اڈہلوک دیوان اٹی کرے۔ دیوان اٹی بنجائی وزیر خزانہ و محصولات اسحاق ڈار، بنجائی وزیر قومی غذائی رکھ و پٹ پول طارق بشیر چیمہ، بنجائی وزیر ڈٹ بندی احسن اقبال، ہر چار آصوبہ، گلگت بلتستان و آزادکشمیر نا چیف سیکرٹریک، اسلام آباد کیپیٹل ٹیریٹری نا چیف کمشنر و ایلو تعلقدار بڑزکو سرکاری آفیسر آک بشخ ہلکر۔ وزیراعظم پارے کہ الس ءِ بنداوی المی آ گڑاتا بے سلنگ آن و کم نہاد اٹی فراوانی بنجائی و صوبائی حکومت آتا اولی زمواری ءِ۔ بنداوی کنوئی آ گڑاتا دستیابی ءِ پک کننگ کن گام گیج کننگے۔ وزیراعظم کوڑی کننگ نا برخلاف سخت کارروائی و المی آ گڑاتا سپلائی چین ءِ برقرار تخنگ ناپارت کرے۔ اوپارے کہ ملک اٹی خولم تون اوار ایلو بنداوی آ کنوئی آ گڑاتا ہچ ءُ کمتی اس اف۔ وزیراعظم بنجا و صوبہ غاتے المی آ گڑاتا سپلائی چین ءِ برجا تخنگ نا بابت رابطہ و ہم گرنچی ءِ گچین کننگ نا پارت کرے۔ وزیراعظم پارے کہ بنداوی گرج انا گڑاتا درآمد اٹی بروک آ اڑاند آتے اولیتی بنداو آ مُر کننگے۔ وزیراعظم سپلائی چین ءِ گچین کننگ و نہاد آتیٹی گچینی اتنگ نا بابت خصوصی کمیٹی جوڑ کننگ نا پارت کرے۔ وزیراعظم پارے کہ روچہ ٹی کنوئی آ گڑاتا اڑزان نہاد آ فراوانی و اڑزان روچہ بازار تا بابت غٹ صوبہ و انتظامی یونٹ آک بروک آ جاچ دیوان اٹی پبی ءُ حکمت عملی پیش کیر، روچہ بازار تیٹی نہاد آتیٹی سوگوی نا بابت ٹیکنالوجی ءِ کاریم اٹ اتنگے۔ وزیراعظم پارت کرے کہ روچہ بازار تیٹی سیکورٹی نا درکار گام گیج آتے پک کننگے۔ وزیراعظم مچ آ ملک اٹی بنداوی کنوئی آ گڑاتا دستیابی ءِ پک کننگ نا پارت کرسا پرمان کرے کہ کوڑی کروک آتا برخلاف سخت کارروائی کننگے تانکہ المی آ گڑاتا سپلائی چین ءِ برقرار تخنگ مرے۔ وزیراعظم دا چرجوئی ٹی بنجاو صوبہ غاتا نیام اٹ رابطہ و ہم گرنچی ءِ گچین کننگ نا تاکید کرے۔ وزیراعظم کنوئی آ گڑاتا سپلائی چین ءِ گچین کننگ و نہاد آتیٹی گچینی اتنگ نا بابت خصوصی کمیٹی جوڑ کننگ نا ہم پارت کرے ہرافتا نوٹیفکیشن اینو جاری مریک۔ وزیراعظم خصوصی پارت جاری کرے کہ ہموگڑا ہرافتا کاریم اٹ اتنگ روچہ ٹی ودک اوفتا آسان و اڑزان دام تا فراوانی ءِ پک کننگے۔ وزیراعظم بنداوی گرج انا گڑاتا درآمد اٹی بروک اڑاند آتے اولیتی بنداو تیا مپر کننگ نا پارت ہم کرے۔ اوتاکید کرے کہ روچہ ٹی کنوئی آ گڑاتا اڑزان دام فراوانی و اڑزان روچہ بازار تا ببت صوبہ و انتظامی یونٹ آک بروک آ جاچ دیوان اٹی پبی حکمت عملی اس پیش کیر۔ وزیراعظم بھلا آبادی والا شار تیٹی روچہ بازار تا کچ ءِ ودفنگ نا ہم پارت کرے۔ دیوان ءِ پاننگاکہ ملک اٹی کنوئی آ گڑاتا ہچ ءُ کمتی اس اف، و الس اسکان خولم، دال، کنوئی آ تیل اتون اوار ایلو گڑاتا فراوانی کن جوان گام گیج کننگ انگ ءِ۔ دیوان ءِ پاننگاکہ بنجانا کنڈ آن صوبہ غاتے اوفتا گرج انا رداٹ خولم تننگ انگ ءِ۔ دیوان ءِ پاننگاکہ گڑاتا تینا خود آن کاختی ودی کروک آتا برخلاف سخت کارروائی کننگک۔ دیوان ءِ مستی پاننگاکہ صارف آتے بنداوی کنوئی آ گڑاتا اڑزان دام تا فراوانی نا بابت گڑاس صوبہ غاتیٹی موبائل فون ایپلی کیشن تے کاریم اٹ اتنگ انگ ءِ۔

(اے پی پی)