90 دے ٹی گچین کاری کرفپننگ آئین آن چَپ ءِ، عمران خان
صدر پیوٹین آن اڑزان تیل ہلنگ نا ڈٹ آ ہیت و گپ کریسن، پدی بننگ آ جنرل باجوہ پارے کہ روس انا مذمت ءِ کر
لاہور : پاکستان تحریک انصاف نا چیئرمین عمران خان پارینے کہ گچین کاری تا بابت بہانہ کننگ انگ ءِ‘ وخت اس کہ آئین پائک کہ گچین کاریک بایدے نود دے اٹ مریر و گچین کاری کرفپننگ آئین نا خلاف ورزی ءِ‘ صدر پیوٹین تون اڑزان تیل ہلنگ نا ہیت کریٹ ہراتم پدی بسٹ تو جنرل باجوہ پارے کہ روس انا مذمت ءِ کر او یوکرین آ جلہو کننگ اٹی ءِ‘ ای پاریٹ ہندوستان مذمت کپننگ ءِ گڑا نن انتئے کین‘ ای پاریٹہ کہ کل اتون تینا تعلقداری تے گچین کننگے‘ مچ آدنیا ٹی خارجہ پالیسیک ملک انا فائدہ کن جوڑ کننگرہ۔ دا خیال آتا درشانی ءِ او لاہور اٹ ویڈیو لنک آ اسکالر وطالب علم آتیان تران کرسا کرے۔ عمران خان پارے کہ ای اسکالر اس افٹ ولے تاریخ ناطالب علم اسے اٹ‘ دنیا ٹی ملک آک قومیت نا پن آ جوڑ مسر‘ پاکستان کلمہ نا بنداو آ جوڑ مسنے‘ دانشور آک مخلوق اٹ شعور تالان کیر کہ ننا بنیادی مسخت انت ءِ۔ پاکستان اسلام نا پن آ جوڑ مس وخت اس کہ چین وایلو شون ہلوک ملک آک نبی کریمؐ نا اصول آتیا چلینگ انگ ءُ‘ نبی کریمؐ نا اصول آتیا چلینگوک راج شون ہلیک۔ کرکٹ نا سوب آن دنیا ءِ خننگ نا وارخواہی رسینگا‘ہر ملک ءِ بھاز خڑک آن خنانٹ‘ ہمو سوب انت ءِ کہ مخلوق یورپ آہننگ کن تینا جان تا پرواہ ءِ ہم کپسہ‘ مخلوق کشتی تے ٹی یورپ آ کاہک و بھاز آک کسر اٹ ہم کہیرہ۔ دنیا نا اولیکو ریاست مدینہ ئس‘ ہرا اصول، عدل و انصاف نا اصول آ عمل کریکہ‘ او پارے کہ دنیا نا اولیکو فلاحی ریاست مدینہ نا ئس‘ ریاست مدینہ نا اولیکو اصول عدل وانصاف ئس‘ انسان و ساہدار تا راج اٹ بھلا فرق انصاف مریک‘ انصاف آن راج آجو مریک‘ نبی کریمؐ نا دور اٹ دنیا نا کل آن بھلا انقلاب بسوسس‘ دنیا ٹی ملک آک قومیت نا بنداو آجوڑ مسر۔ عمران خان مستی پارے کہ انصاف بیرہ کس انا خذمت کننگ آن مے مفک‘ مے مولد آ انسان وخت اس بھلو کاریم کتنے‘ ذہنی و ربیدہ ئی وڑ اٹ زہمی مننگ ہم مے مولدی اسے‘ ہر کس انگریزی چاہس اودے راج اٹ شرف تننگک‘ ہرا ملک آتے ٹی کانود نا حکمرانی اف اوفتا حالیت ءِ ہننگے۔ عمران خان پارے کہ حکمران آتا دز مننگ آن ملک بھس مریک‘ ہرا ملک آتے ٹی کانود نا حکمرانی ءِ ہموڑے شونداری و شونہالی ءِ۔ ولے پاکستان اٹ بیرہ نزور کن مریک‘ واکدار انت کہ مرضی کے اوڑان کس ارفپک۔ اوپارے کہ پنجاب اٹ گچین کاری تا بابت رے تے کننگ انگ ءِ‘ آئین اٹ ارے کہ گچین کاریک بایدے 90 اٹ مریر‘ ولے حکومت پاننگ اٹی ءِ کہ گچین کاری کرفنگ کن پیسہ اف‘ گچین کاری کرفپننگ آئین نا خلاف ورزی ءِ۔ او پارے کہ دا ہم ہیت اسے کہ گچین کاری کرفنگ کن پیسہ اف‘ بھلا وزیرک دزی کیرہ گڑا تو ملک بھس مریک‘ مچ آدنیا ٹی خارجہ پالیسی مک انا فائدہ کن مریک ولے پاکستان اٹ خارجہ پالیسی آن مخلوق ءِ نسخان رسیفنگ انگ ءِ‘ پاکستان اٹ کوزہ گیر مافیا پیری کننگ اٹی ءِ۔ چین 450 وزیر ءِ کرپشن آ سزا تسنے‘ چین کل آن ترند شون ہلوک آملک ءِ۔
(آن لا ئن)