صدر و وزیراعظم ناضیامحی الدین نا کزیت آ ہڑزخواہی

اسلام آباد : وزیراعظم محمد شہباز شریف جہانی شہرت یافتہ پنی آ ہدایت کار، صداکار، اداکار، نوشتکار و میزبان ضیامحی الدین نا کزیت آ ہڑزخواہی کرینے۔ دوشنبے نادے آ وزیراعظم آفس نامیڈیا ونگ آن جاری بیان نا رداٹ وزیراعظم پارے کہ ضیا محی الدین تینا جند اٹی اسہ فن پارہ اس ئس اونا مخصوص انداز پاکستان تون اوار مچ آ دنیا ٹی ئس۔ افسوز ءِ کہ کیہی زیباانگا جوانی تا خواجہ بندغ دنیا غان ہِنا۔ وزیراعظم پارے کہ ضیامحی الدین پاکستان اٹی ٹیلی ویژن ہوسٹنگ ءِ اسہ پوسکن ءُ جہد اسے اٹ روشناس کرفے و جہانی کہول آ اداکاری نا کمک اٹ پاکستان نا پن ءِ پیشن نا ملک اٹی روشنا کرے۔ نیشنل اکیڈمی آف پرفارمنگ آرٹس انا صدر نا وڑاٹ او پوسکن آ بروک آ فنکارآتا تربیت اٹ تینا شاندار کڑد ءِ ادا کرے۔ ضیا محی الدین نا توار ننا دماغ اٹی پنسا کیک۔ وزیراعظم پارے کہ اونا لائخی و اونا خذمت آتے خراج عقیدت پیش کینہ۔ اللہ تعالیٰ ایماندار نا درجہ غاتے بڑز کے و خاہوت ءِ صبر و جمیل ایتے۔ صدر مملکت ڈاکٹر عارف علوی ضیاء محی الدین نا کزیت آ ہڑزخواہی نا درشانی ءِ کرینے۔ ایوان صدر نا پریس ونگ آن جاری بیان نا رداٹ صدر مملکت ضیاء محی الدین نا کزیت آ است ہسونی نا درشانیءِ کرسا فن، ادب، پرفارمنگ آرٹ، فنکاری، ہدایت کاری نا بشخ اٹی ایماندار نا خذمت آتے خراج عقیدت پیش کرے۔ صدر مملکت پارے کہ ضیاء محی الدین نا کزیت کنا جند اکن ہم نسخان اسے۔ فن، اداکاری، پیشکش، ہدایت کاری نا بشخ اٹی ضیاء محی الدین اسہ پنی ءُ شخصیت اس ئس۔ او نثر و شاعری نا گچین ءُ خوانوک اس ئس و سازوزیمل تون اوار خواناکہ۔ صدر مملکت دعا کرے کہ اللہ تعالیٰ فن نا بشخ و اونا خاہوت ءِ دا ڈکھیائی ءِ صبر اٹ سگنگ نا ہمت عطاکے۔ صدر مملکت ایماندار نا درجہ غاتا بڑزی کن دعا، فن نا بشخ اٹی خذمت آتے خراج تحسین پیش کرے۔

(اے پی پی)