ڈیجیٹل مردم شماری نا بابت بلوچستان اٹی 35 سنٹر جوڑ
14 فروری آ ضلعی مردم شماری کورڈینشن کمیٹی و 15 فروری آ ڈویژنل کمیٹی تا دیوان اٹ ترسا کاریم تے سر تننگے، چیف سیکرٹری
Get real time updates directly on you device, subscribe now.
کوئٹہ : چیف سیکرٹری بلوچستان عبدالعزیز عقیلی ناکماشی ٹی صوبائی مردم شماری کوآرڈینیشن کمیٹی نا اہم ءُ دیوان اس اڈہلک۔ ایڈیشنل چیف سیکرٹری داخلہ سینئر ممبر بورڈ آف ریونیو سیکرٹری ایس اینڈ جی اے ڈی سی‘ سیکرٹری بلدیات سیکرٹری تعلیم آئی جی پولیس ڈویژنل کمشنر ڈی سی کوئٹہ چیف مردم شماری کمشنر اسلام آباد و صوبائی مردم شماری کمشنر بلوچستان دیوان اٹ بشخ ہلک۔ صوبائی مردم شماری کمشنر نور احمد پرکانی کمیٹی ءِ بریف کرے و تینا پراگریس ءِ پیش کرسا پارے کہ صوبہ ٹی 35 مردم شماری سینٹر جوڑ کننگانے۔ 7167 انومریٹرز (Enumerators)، 995 سپروائزری اسٹاف نا ٹریننگ پورو کننگانے و دا وخت اسکان درکار 8137 ٹیبلیٹ / Devices ضلع غاتسکان سر کننگانے و انومریٹر اسکان بشخ وبانٹ کننگ نا مرحلہ 16 فروری آن بنا کیک۔ چیف سیکرٹری بلوچستان پرمان کرے کہ 14 فروری آ ضلعی مردم شماری کوآرڈینیشن کمیٹی تا و 15 فروری آ ڈویژنل کمیٹی تا دیوان تے اڈ تننگے و کل امور تے گڈیکو دروشم تننگے تاکہ ڈیجیٹل مردم شماری 2023 گچین وڑ اٹ پورو مرے۔ چیف مردم شماری کمشنر کمیٹی ءِ پارے کہ 20 فروری آن 3 مارچ اسکان سیلف انومیریشن نا مرحلہ مریک و بندغ آک تینٹ پورٹل آ کار و تینا اُرا و مردم شماری کرفر و اوکان گڈ فیلڈ ورک بنا کننگک‘ ہرا اپریل نا اولیکو ہفتہ ٹی پورو مریک۔ کمیٹی نا باسک آک پاریر کہ مردم شماری نا وخت آ ویجلینس کمیٹی تا جوان کاریم کننگ و سہی ڈیٹا ریکارڈ کننگ ءِ پک کروئی مریک۔ ایڈیشنل سیکرٹری داخلہ آئی جی پولیس وایلوتعلقدار کمامدار آک مردم شماری کن سکیورٹی بست وبند آتا بارو اٹ ہم بریفنگ تسر۔ چیف سیکرٹری بلوچستان صوبائی مردم شماری کمشنر و ڈویژنل کمشنرآتے پرمان کرے کہ ہر کہول آ کوآرڈینیشن ءِ گچین کننگے و ڈیش بورڈ نا کمک اٹ مانیٹرنگ و رابطہ ءِ پک کننگے۔ صوبائی مردم شماری کوارڈینیشن کمیٹی نا بروک آدیوان 16 فروری آ مریک۔
(خ ن)