بلوچستان نا 9 نا 37 یونین کونسل اٹی پولیو تور نا خصوصی مہم نا بنا

کوئٹہ : ایمرجنسی آپریشن سینٹر بلوچستان نا کوآرڈی نیٹر سید زاہد شاہ پارینے کہ بلوچستان نا 9 ضلع نا 37 یونین کونسل اٹی پولیو تور انا خصوصی مہم 13 فروری دوشنبے نادے آن بناءِ کننگانے، ہفت دے ئی پولیو تور مہم اٹی پنچ سال اسکان نا وئی نا اسہ لکھ 27 ہزار 53 نا خڑک چنا ءِ پولیو آن بچفنگ نا پڑی کُنفنگک، پولیو مہم اٹی 575 نا خڑک ٹیمک چناتے پولیو نا پڑی کنفرہ۔ مہم اٹی غٹ عملہ ءِ فول پروف سیکورٹی تننگک، ہراڑا بلوچستان لیویز، پولیس و ایف سی نا ورناک تعینات مریرہ، پولیو دین دا چناتے تینا شست کننگ کیک ہرا پولیو آن بچفنگ نا پڑی کُنفنگ آن محروم سلرہ۔ داخیال آتا درشانی ءِ او میڈیا آن بناٹی گپ وتران کرساکرے۔ اوپارے کہ پولیو تور مہم بھاز 9 ضلع غاتا 37 حساس یونین کونسلز و رفیوجز کیمپ اٹی مریک کوئٹہ نا یونین کونسل، پنجپائی، قلعہ سیف اللہ نا اِرا یونین کونسلز، پشین نا چار یونین کونسلز چمن ناپنچ یونین کونسلز قلعہ عبداللہ نا شش یونین کونسلز چاغی نا نہہ یونین کونسلز لورالائی مسہ یونین کونسلز نوشکی نا چار یونین کونسلز وژوب انا مسہ یونین کونسلز اوار ءُ۔ اومستی پاریے کہ مہم اٹی غٹ عملہ ءِ فول پروف سیکورٹی تننگک۔ ہراڑا بلوچستان لیویز، پولیس و ایف سی نا ورناک تعینات مریرہ، پولیو دین ہمو چناتے تینا شست کیک ہرا پولیو آن بچفنگ نا پڑی تیان محروم سلرہ۔ سید زاہد شاہ پارے کہ بلوچستان اٹی جنوری سال 2021آن داتم اسکان نا اسہ کیس اس ہم رپورٹ متنے، بلوچستان نا چاگڑد اٹی اپریل 2021آن داتم اکان پولیو دین مون آ بتنے۔ ملک انا ایلو صوبہ غاتا ضلع و اوغانستان اٹی پولیو دین نا ساڑی گری صوبہ بلوچستان نا چناتیکن اسہ بھلو خطرہ اسے۔ او غٹ لمہ و باوہ غاتیان خواست کرے کہ پولیو آن بچفنگ نا مہم اٹی پولیو ورکرزآتون پبی کمک کیر، تینا چناتے پولیو ویکسین ضرور کنفر۔

(اے پی پی)