سیمی علاقہ ماشکیل، دکان اسے آ سم کاری، پنجاب آن تعلقدار 5 مزورکار زوال

بلوچستان نا ضلع واشک نا سیمی علاقہ ماشکیل اٹی نادرست سلہہ بند بندغ آک دکان تیا سم کاری کریر، ہرانا سوب آن ہموڑے کاریم کروک 5 بندغ زوال مسر۔ پولیس حوالی نا رِد اٹ، زوال مروک آ ہر پنچ بندغ خواری کش ئسر و اوفتا تعلقداری پنجاب نا جتا جتا علاقہ غاتیان ئس، ہرافک داڑے مزوری کن بسوسر۔ سلہہ بند دوبہ دار آک ہمو دکان ٓتے شست کریر ہراڑے دا پنجابی مزور آک کاریم کریرہ و سم کاری کننگ آن پد جلہو گیر آک آسانی اٹ نرار۔ واقعہ نا حوال رسینگ تون پولیس و کانود نافذ کروک ادارہ غاتا کارندہ غاک واقعہ نا ہند آ سر مسر و علاقہ ءِ گھیڑ کرسا شاہدی تے مچ کریر۔ پولیس حوالی نا رد اٹ زوال مروک آتا لاش تے ہسپتال اٹ المی کارروائی و کانودی خواست آتے پورو کننگ آن پد اوفتا باوہ پیرہ ئی علاقہ غاتیا راہی کننگ انگ ءِ۔ پولیس انتظامیہ نا کنڈ آن دا لغوری واقعہ نا سخت انگا لوز آتے ٹی مذمت ءِ کرسا مقدمہ درج کرے و دوبہ دار دزگیری کن جاست پاست نا باقاعدہ بناءِ کرےِ۔ ایلو کنڈ آ حکومت بلوچستان ماشکیل اٹی سم کاری نا است ہسون کروک واقعہ ٹی پنچ کودک و بے گناہ مزور کار آتے خلنگ نا سخت نوٹس ہلسا واقعہ نا دمدستی و شفاف جاست پاست نا پارت کرینے۔ وزیراعلیٰ بلوچستان نا حوالکاری و سیاسی باندات کمکار شاہد رند واقعہ نا سخت انگا لوز آتے ٹی مذمت ءِ کرسا پارے کہ کودک و بے گناہ شاری تا کسفنگ اسہ بھلو ڈوہ اسے ہرادے ہچ ءُ حالیت اسے ٹی سگنگ مفک۔ او پارے کہ حکومت بلوچستان زہمی خاہوت آتا غم اٹ بریبر نا شریدار ءِ و اوفتے ہر وڑ انا کمک فراوان کننگک۔ شاہد رند پارے کہ وزیراعلیٰ بلوچستان میر سرفراز بگٹی نا پارت آ کانود نافذ کروک ادارہ غاتے واقعہ نا زموار آتا دمدستی دزگیری، جم جاست پاست و دوبہ دار آتے اوفتا ایسر اسکان اسکان سر کننگ نا پیدوار پارت کننگانے۔ او پارے کہ دا است ہسون واقعہ نا زموار اسہ بندغ اس ہم کانود آن بچنگ کپک۔او پارے کہ بلوچستان اٹی امن و ایمنی ءِ لتاڑ کننگ و الس اٹی خلیس وبھیم تالان کننگ نا ہر کوشست ءِ ریاست پورو واکداری اٹ بے سہب کیک۔ حکومت شاری تا جان و مال انا رکھ ءِ تینا اولیکو زمواری سرپند مریک و امن کن کل دوئی وسیلہ غاتے کاریم اٹ اتنگ ءِ۔ کمکار وزیراعلیٰ پارے کہ حکومت بلوچستان کانود نا بالادستی آ پورو پت کیک و الس ءِ انصاف نا دمدستی فراوانی ءِ پک کیک۔ او باور کرفے کہ واقعہ نا جاست پاست میرٹ آ پورو کننگک و زموار آتے کانود نا مون آسلفسا سخت سزا تننگک۔